Ministrja e Infrastrukturës, Belinda Balluku teksa prezantoi projektet që pritet të përfundojnë brenda mandatit të tretë qeverisës, tha se porti i ri i Durrësit, aeroporti i Vlorës dhe Sarandës, pritet të përfundojnë brenda këtij afati.
“Pa dashur të përsëritem dhe të jap informacione që janë dhënë, siç jeni në dijeni sepse ne i kemi bërë të gjitha garat publike, do ndaloj tek portet. Portet janë pjesë e paketës së zhvillimit. Kanë nisur disa prej tyre, siç është porti i ri i Durrësit në Porto Romano, ku gara përmbyllet në fund të muajit Tetor. Gara ndërkombëtare do të vendosë edhe një kohë limiti për 36 muaj. Porti i ri dorëzohet brenda këtij mandati. Porti i Vlorës do të kthehet në port jahtesh. Porti tregtar zhvendoset në zonën e Triportit. Pas operimeve që kanë nisur në mënyrë normale pa asnjë lloj kufizimi në aeroportin e Kukësit. Brenda nëntorit nisim kantierin për aeroportin e Vlorës, ndërsa kemi hapur garën për aeroportin e Sarandës. Do jetë aeroport turistik sezonal. Na rezulton që do të përpunojë kapacitete të rëndësishme nga muaji prill deri në muajin nëntor për lëvizje charter”.
Sa i përket Korridorit Blu, ministrja tha se është shtyrë për një afat tjetër, dhe nuk pritet të përfundojë brenda këtij mandati.
“Duke marrë parasysh afatet për garën dhe kontratën, parashikohet të dorëzohet në pranverën 2025, në përfundim të mandatit të tretë. Korridori Blu, për të cilin jemi përgatitur prej kohësh, është një garë që e kemi lançuar, por për shkak të pandemisë u shty për një afat tjetër. Me fillimin e punës do të rihapet gara, por nuk pritet të përfundojë brenda këtij mandati. Për të plotësuar këtë korridor një nga pjesët më të rëndësishme është Bypass-i i Gjirokastrës”.
Ajo u shpreh se Shqipëria do të bëhet me tre linja hekururdhore, ku përpos asaj Tiranë-Durrës, qeveria parashikon ndërtimin e linjave Vorë-Hani i Hotit dhe Durrës-Pogradec.
“Kemi arritur të përmbyllim fazën përgatitore të projektit të parë hekurudha Tiranë-Durrës. Kantieri nis në fund të këtij muaji, para se të mbarojë shtatori. Jemi në fazë negociatash për hekurudhën Vorë-Hani i Hotit që do krijojë akses edhe në vende të tjera të Ballkanit. Kjo hekurudhë prek një pjesë të mirë të gjithë territorit. Banka e Investimeve ka marrë përsipër të na mbështesë për segmentin nga Durrësi në Pogradec, por ndërkohë do të nisim me segmentin e parë nga Durrësi në Rrogozhinë”, tha ministrja.
Belinda Balluku është rikonfirmuar në detyrë nga kryeministri Rama si ministre e Infrastrukturës për mandatin e tretë qeverisës.
