Ministri i Drejtësisë, Ulsi Manja, ka zhvilluar sot një takim në Asamblenë Kombëtare të Noterisë. Manja gjatë fjalës së tij ka kritikuar noterët për mangësitë që kanë shfaqur kohët e fundit, apo problemet me korrupsionin që janë evidentuar herë pas herë në media. AI është shprehur se në fushën noteriale nis një erë e re në zbatim të ligjit dhe në shërbimin dinjitoz ndaj qytetarëve. Po ashtu ai kërkoi që noterët të mos bëhen palë me institucionet financiare, duke paralajmëruar se do të merren masa shumë të rrepta ndaj tyre.
“Kisha shumë për të folur me noterët e Shqipërisë dhe zgjodha Asamblenë Kombëtare të Noterisë për t’i thënë problemet tona sy më sy. Si Ministër i Drejtësisë, monitorues i drejtpërdrejtë i punës së tyre, them me bindje se në fushën noteriale nis një erë e re në zbatim të ligjit dhe në shërbimin dinjitoz ndaj qytetarëve. Kërkova me këmbëngulje që noterët të mos bëhen palë me institucionet financiare jo banka (mikrokredive), dhe të lexojnë siç parashikon ligji, detyrimet e kontratave për qytetarët, sepse në shumë raste shqiptarët po mbeten peng”, u shpreh ministri ndërsa theksoi se, në shërbim të këtij qëllimi kemi ngritur dhe kanë nisur inspektimet tematike dhe në çdo heqje licence do të bëj dalje publike duke renditur abuzimet e kujtdo qoftë.
Discussion about this post