Në komunën e Dibrës në Maqedoninë e Veriut po mbahet sot balotazhi për zgjedhjet lokale. Kjo është komuna e vetme ku raundi i dytë i zgjedhjeve po zhvillohet më vonë, për shkak të parregullsive të konstatuara në një qendër votimi ditën e zgjedhjeve, më 17 tetor.
Maqedonia e Veriut votoi për raundin e dytë të zgjedhjeve lokale më 31 tetor, në një garë për 44 komuna nga 81 gjithsej. Për postin e kryetarit të komunës së Dibrës garojnë Hekuran Duka i Bashkimit Demokratik për Integrim dhe Bekim Pocesta i Aleancës për Shqiptarët. Gara mes tyre vlerësohet të jetë e ngushtë, pasi që në raundin e parë zoti Pocesta pati një epërsi me mbi 200 vota ndaj zotit Duka.
Dibra ka 19 mijë votues; pjesëmarrja në raundin e parë të zgjedhjeve ishte 42 për qind. Autoritetet zgjedhore thonë se deri në orën 15 janë pranuar 8 ankesa. Aleanca për Shqiptarët është ankuar për bllokimin e rrugës nga Mavrova drejt Dibrës për shkak të punimeve që po kryen në të, një gjë që, sipas saj e ka bërë të pamundur për shumë dibranë që punojnë në qytete të tjera të votojnë.
Qendrat e votimit mbyllen në orën 7 të mbrëmjes. Komisioni Shtetëror i Zgjedheve duhet të bëjë publike rezultatet paraprake jo më vonë se dymbëdhjetë orë pas përfundimit të votimit. /Marrë nga VOA.
Discussion about this post