Maqedonia e Veriut ka pritur grupin e dytë të afganëve ditën e sotme. Në aeroportin e Shkupit kanë zbritur 44 afganë përfshirë fëmijë, gra dhe burra.
Ata janë pritur nga përfaqësuesit e Kryqi të Kuq, të cilët i dërguan në një hotel ku edhe do t’i nënshtrohen kontrolleve mjekësore dhe testeve PCR për COVID-19 ndërsa do tu ofrohet edhe mundësia e vaksinimit. Sipas mediave maqedonase, afganët janë ish-punonjës të organizatave ndërkombëtare, që kanë punuar në Afganistan deri para marrjes së pushtetit nga talibanët pas largimit të ushtarëve amerikan.
Në Maqedoninë e Veriut në grupin e parë ishin 149 persona, ish-punonjës të organizatave ndërkombëtare së bashku me familjet e tyre. Shteti fqinj ka thënë se do të strehojë gjithsej 750 afganë.
Kryeministri Zoran Zaev ka siguruar qytetarët se Maqedonia e Veriut nuk rrezikohet nga civilët afgan që kanë ikur nga vendi i tyre, për shkak të frikës nga hakmarrja e talibanëve. Zaev ka thënë se me vendimin për strehimin e afganëve, vendi ka dëshmuar humanitetin duke u rreshtuar pranë shteteve të tjera që po bëjnë gjithçka për të shpëtuar jetët e njerëzve të pafajshëm.
