Në Maqedoninë e Veriut mbahen sot zgjedhjet parlamentare dhe raundi i dytë i zgjedhjeve presidenciale. Kutitë e votimit në 3840 qendra votimi janë hapur në orën 07:00 dhe do mbyllen në 19:00, ndërsa të drejtën e votës e kanë mbi 1.8 milion votues, të cilët do të votojnë për 17 parti politike dhe koalicione.
Në zgjedhjet për parlamentin maqedonas, partitë më të mëdha në koalicion me parti më të vogla janë VMRO-DPMNE dhe LSDM, ndërsa shqiptarët shkojnë të ndarë në dy blloqe, Fronti Demokratik me BDI, me në krye Ali Ahmetin, Aleanca për Shqiptarët me Ziadin Sela, Partia Demokratike Shqiptare me Menduh Thaci, dhe partitë e turqve, boshnjakëve dhe romëve.
Ndërsa në bllokun opozitar, VLEN, koalicion i mbishtetur nga Albin Kurti, ku Vetëvendosje ka kandidatët e saj në listën e përbashkët, bëjnë pjesë një pjesë e Aleancës për Shqiptarët e Arben Taravarit, me Alternativën e Afrim Gashit, Lëvizjen Evropiane të Izet Mexhitit dhe Besa e Bilal Kasamit.
Për formimin e kabinetit qeveritar nevojiten 61 vota nga 120 vendet në parlament. Në zgjedhjet e kaluara parlamentare të vitit 2020, LSDM mori 46 mandate, por në koalicionin qeverisëse ishin edhe partitë shqiptare me 32 deputetë, ku 15 prej tyre i kishte BDI. Për sa i përket historikut të deputetëve shqiptarë në Maqedoninë e Veriut numri më i madh i shqiptarëve të ulur në parlamentin maqedonas ka qenë në vitin 2002 me 36 deputetë dhe në 2020 me 32 deputetë, ndërsa numri më i ulët në 1994 me 21 deputetë dhe në 1990 me 23 deputetë.
Shqiptarët kanë bërë koalicion 6 herë me VMRO-në dhe 4 herë me LSDM-në. Nga koalicionet me LSDM-në shqiptarët kanë përfituar më siç ishte miratimi i ligjit për gjuhët dhe zgjedhja e Talat Xhaferit kryetar parlamenti dhe kryeministër. Në votimet e të mërkurës marrin pjese rreth 1 milion e 8 mijë votues, ku do të zgjidhet presidenti dhe partia ose koalicioni qe do të drejtojë Maqedoninë e Veriut në sfidën kryesore të këtij mandati, atë të ndryshimeve kushtetuese.
Discussion about this post