Shumë shkolla të Librazhdit kanë probleme me ngrohjet, infrastrukturën e shpesh edhe me stafin arsimor. Probleme të tilla infrastrukturore ka edhe shkolla e bashkuar “Shefqet Dosku” që ndodhet në fshatin Dorëz. Bashkia ka vendosur një fond të madh prej 768 milionë lekë për riparimin e saj. Dhe vlera e madhe e fondit limit justifikohet me ngritjen një palestre për këtë shkollë. Por riparimi i saj ka nisur me një kontratë korruptive.
Tenderi është hapur më 3 maj 2024, me objekt “Rikonstruksion dhe ndërtim i palestrës shkolla e bashkuar “Shefqet Dosku”. Procedura ka qëndruar e hapur deri më 21 maj, kur është zhvilluar faza e parë.
Kryetarit Disha nuk i është dashur shumë kohë që të mbyll procesin pasi ka zgjedhur rrugën më shkurt si gjithmonë, duke ia dhuruar kontratën biznesit të favorizuar.
Mundësi për garë të rregullt kishte, pasi u dorëzuan 6 oferta nga kompanitë pjesëmarrëse. Pesë prej tyre ishin oferta më të lira, që fillonin nga 559 milionë lekë deri në 622 milionë lekë.
Por kryebashkiaku Disha nuk e ka marrë në konsideratë asnjërën prej tyre.
Komisioni i ofertave i ka skualifikuar fillimisht 4 kompani që në fazën e parë nga gara për shkak se iu mungonin disa dokumente, si për shembull listpagesa e punonjësve, apo vërtetim që kanë kryer më parë punë të ngjashme. E qartë që ato firmë janë skualifikuar jo në bazë të rregullores. Pas tyre është skualifikuar edhe një kompani tjetër, ndërsa për në fazën finale mbeti vetëm kompania “Ergi” SHPK, që propozoi ta kryejë këtë punë me 768 milionë lekë.
Pasi ishte eliminuar konkurrenca me ndihmën e komisionit, “Ergi” Sh.p.k. u shpall fituese. Deri më datë 9 korrik 2024, kontrata nuk u bë publike. Por, ndërkohë mësojmë se, Open Data Albania i ka vendosur tenderit një ‘Flamur të kuq”, që është shenja e riskut të korrupsionit.
Përfitimet e Ballës
Në çdo tender ku përfshihet Ergi Shpk, me pronar Nuri Ballën, ngrihet një “Flamur i kuq”, sepse zyrtarët e favorizojnë në shkelje të ligjit. Kështu ka bërë edhe Mariglen Disha.
Kështu, Ergi Balla, administrator i firmës “Ergi” Shpk është kthyer në një biznesmen që përpin fondet e bashkive mbështetur në këtë metodë.
Nga kryetari Disha, Balla ka përfituar edhe një tender në korrik të viti 2023, për të ndërtuar palestër në një shkollë në fshatin Polis. Bëhet fjalë për tenderin me objekt tenderit me objekt “Ndërtim i shkollës së mesme Polis dhe ndërtim Palestre, Bashkia Librazhd”, me vlerë 931 milionë lekë.
Edhe ky tender mban ‘Flamurin e Kuq’ për eliminimin e konkurrencës.
Balla është gjithashtu i përfshirë në aferat e inceneratorëve. Kujtojmë se, më 19 qershor 2023, kompania shtetërore “ECO-ELB” që ka në administrim landfillin dhe inceneratorin “Albtek Enery”, i ka dhënë firmës “ERGI Sh.p.k”, të drejtën e modifikimit, testimit dhe ndezjes së inceneratorit të Elbasanit, kundrejt vlerë 27.5 milionë lekë.
Në vitin 2018, kjo kompani mori tenderin korruptiv “Rikonstruksion dhe shtesë anësore shkolla e Mesme e Bashkuar “ Isa Alla”, fshati Zgosht , NJ.A Lunik. Në të njëjtën kohë përfitoi paratë për “Rikonstruksionin e ujësjellësit të Fshatit Prevallë, Njësia Administrative Lunik.
Gjithashtu në vitin 2018, Balla fitoi tenderin me “Flamur të kuq” “Konstruksion i hapësirës multifunksionale Sportive, Qyteti Librazhd”. Këtu bëjmë një krahasim:
Për këtë rikonstruksion janë dhënë 60 milionë lekë, ndërsa për palestrën e shkollës “Shefqet Dosku” duhen 768 milionë lekë!
Një vit më pas (2019) ERGI ka marrë në dorë asfaltin e Librazhdit duke rrëmbyer paratë e tenderit “Rikonstruksion me asfaltobeton i rrugëve të dëmtuara në qytet dhe njësitë administrative”. Ndërsa në prill 2019, kompania do të favorizohej në tenderin “Shtesë anësore 3 kate dhe ndërtim palestre për shkollën 9- vjeçare Vilson Blloshmi, Librazhd”. Nuk duhet nëse kanë ndonjë lidhje farefisnore me ministrin e brendshëm, Taulant Balla, por zakonisht në rolin e deputetit të zonës ky ka qenë prezent në fillim dhe mbarim të punimeve duke prerë shiritin.
Në vitin 2020, kompani rikthehet në Lunik për tenderin “Rikonstruksion dhe shtim prurje në Ujësjellësin Letem , Njësia Lunik”.
Janë mbi 70 tendera të marra nga kjo kompani që kryesisht u përfituan duke u favorizuar nga kryetarët e bashkive.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post