Kryetari i Bashkisë Librazhd, Mariglen Disha, ka përfunduar në KPP për shkak të abuzimeve me tenderët. Gijotina.com ka denoncuar disa herë kontratat korruptive që firmos Disha sidomos për rrugët e zonave periferike, por këtë herë çështja ka shkuar edhe më tej. Bëhet fjalë për tenderin me objekt “Sistemim asfaltim i rrugës së fshatit Vehcan, faza e I-rë Njësia Administrative Hotolisht, Bashkia Librazhd” me fond limit 776 milionë lekë.
Më datë 21 qershor 2024, Gijotina.com ka nxjerrë në pah se po hidhen shumë lekë për një shërbim që mund të kushtonte shumë më pak, pasi sipas dokumenteve të projektit, gjatësia e kësaj rruge është vetëm 3.3 km.
Në preventivin e publikuar tregohet se do të bëhen gërmime për të sheshuar rrugën, më pas do të hidhet çakëll dhe 4 cm asfalt.
Më tutje është evidentuar se kontrata është firmosur në shkelje të ligjit mbi prokurimet, pasi është eliminuar konkurrenca.
Kryetari Disha i kishte mundësitë për të zhvilluar një garë konkurruese, sepse fillimisht janë paraqitur 6 oferta, madje dy prej tyre ishin më të lira se sa propozimi i firmës fituese. Sipas dokumenteve 5 firma janë skualifikuar që në fazën e parë, pasi nuk kanë dorëzuar dëshmi që kanë 4 eskavatoristë, ose i kanë të angazhuar edhe në projekte të tjera. Kështu, në fazën finale mbeti vetëm firma “L.T.E CONSTRUCTION, me ofertë 612 milionë lekë.
Denoncimi
Kjo skemë u denoncua si abuzive nga Gijotina.com, duke marrë parasysh edhe ‘Flamurin e Kuq’ që i është vendosur nga Open Data Albania, për riskun e korrupsionit.
Por, tani pikërisht kompania pjesëmarrëse në tender me ofertën më ekonomike, ka bërë denoncimin në Komisionin e Prokurimit Publik.
Në datën 26 qershor 2024, nëpërmjet Sistemit të Ankesave Elektronike pranë Komisionit të Prokurimit Publik, është administruar ankesa e BOE “Sireta 2F” SHPK & “Lis Konstruksion” SHPK për procedurën e prokurimit.
Nga shqyrtimi paraprak i ankesës të sipërcituar, u konstatua se objekti i ankesës lidhet me vendimmarrjen e Komisionit të Vlerësimit të Ofertave mbi skualifikimin e ofertës të paraqitur nga operatori ekonomik ankimues BOE “Sireta 2F” SHPK & “Lis Konstruksion” SHPK.
Sipas dokumenteve, oferta e këtyre dy operatorëve është skualifikuar me argumentin se:
“Nuk ka deklaruar pajisjet e domosdoshme për kryerjen e këtij investimi duke u nisur nga lloji dhe sasia e volumeve të punimeve dhe afati i punimeve si dhe kushtet në të cilat do të kryhet ky investim, Nisur nga kjo KVO gjykon se Shoqëria “LIS KONSTRUKSION“ shpk nuk përmbush përqindjen e Marrëveshjes së bashkëpunimit lidhur më Datë 08.05.2024, pasi nuk disponon mjetet/pajisjet/makineritë e nevojshme për realizimin e punimeve objekt kontrate për punimet te cilat ka marre përsipër.”
Por, ankimuesi shprehet se në dokumentet e dorëzuara prezantohet se ato shërbime që nuk i plotëson LIS KONSTRUKSION“ shpk do të bëhen nga bashkëpunëtori. Prandaj edhe janë bashkuar në këtë ofertë, por me sa duket komisioni vlerësues nuk i ka shqyrtuar fare dokumentet e tyre, edhe pse kishin propozimin më ekonomik.
Gijotina.com ka raportuar se ky tender mban era korrupsion me një vlerë të konsiderueshme që paguhet nga taksat e qytetarëve shqiptarë! Nëse KPP do të mbajë anën e kryebashkiakut, urojmë që biznesmenët të bëhen më të guximshëm dhe të kallëzojnë në SPAK këtë shkelje të barazisë në tender.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post