Kryetari i Bashkisë Librazhd, Mariglen Disha përmendet në disa denoncime për tenderët me shkelje ligjore, por kulmi i abuzimit arrin së fundmi me paratë e ushqimit të kopshteve dhe çerdheve.
Kur ka risk korrupsioni për fondin e prokuruar, nuk përmbushen as në cilësi dhe as në sasi kërkesat e ushqimit për fëmijët. Dhe gjithçka fillon nga nënshkrimi i kontratës së tenderit. Një marrëveshje si kjo që ka bërë Disha flet shumë. Shohim se Bashkia Librazhd ka hapur garën për tenderin me objekt “Furnizim me ushqime për vitin 2024” më datë 16 shkurt 2024. Për ushqimet janë vënë në dispozicion 73 milionë lekë.
Edhe pse për këtë tender kishin paraqitur oferta 5 firma, kryetari Disha i skualifikoi 4 prej tyre dhe ditën kur u mbajt procedura mbeti i vlefshëm vetëm zarfi me ofertën e firmës “ENXHI BALLA” SHPK, në pronësi të Xhevaire Ballës. Duke qenë se nuk kishte më asnjë konkurrent përballë, Balla e përfitoi pa stres tenderin. Duket si një kontratë dhuratë për Ballën sepse me drejtësi duhet të fitonte një kompani tjetër që e kishte ofertën më të ulët.
Siç tregohet në këtë dokument, propozimi më ekonomik është bërë nga kompania MC CATERING SHPK, me vlerën 6115020 lekë (pa TVSH).
Duke qenë se Disha e kishte paracaktuar fituesin, ka shkelur rregullin për konkurrencën që dikton ligji ‘Për Prokurimet Publike’. Prandaj, edhe Open Data Albania i ka vendosur “Flamurin e kuq”. Pavarësisht se Agjencia e Prokurimeve Publike e ka regjistruar kontratën pa shqyrtuar problematikat që ajo mbart, ky prokurim ka risk korrupsioni.
Theksojmë se kjo kompani ka përfituar 17 kontrata duke u favorizuar nga zyrtarët në qarkun Elbasan, në tendera që vlerësohen me “Flamur të kuq”. Kështu ka ndodhur në me tenderin e bashkisë Cerrik “Blerje e produkteve ushqimore dhe jo ushqimore ne ndihme te shtresave në nevojë për përballimin e gjendjes së fatkeqësisë natyrore të shkaktuara nga COVID-19” më 22 prill 2020. Një muaj më vonë një tender të ngjashëm e ka marrë nga bashkia Peqin, gjithashtu me “Flamur të kuq”.
Më 1 korrik 2021 ka marrë pa garë tenderin e bashkisë Belsh “Artikuj ushqimore (dreka) për Qendrën Sociale Ditore për moshën e tretë ‘Nderim brezash’”. Më 3 tetor 2023, ka përfituar në të njëjtën metodë ( pa konkurrencë) tenderin e Azilit të Elbasanit “Blerje produkte ushqimore për shtëpinë e të moshuarve”.
Në të njëjtin institucion ka marrë minikotratë pa garë për prokurimin “Blerje bulmet për shtëpinë e të moshuarve” më 9 tetor 2023. Në të njëjtën formë ka marrë edhe tre lotet e tjera të këtij tenderi furnizimi me ushqime për të moshuarit e azilit. Më pas ka vijuar me dy tenderë me “Flamur të kuq” të përfituar nga qendra sociale Elbasan “Blerje fruta – perime – vezë për Qendrën Sociale Balashe” dhe “Blerje produkte bulmeti për Qendrën Sociale Balashe”.
I fundit zyrtar i peshkuar nga kompania “Enxhi Balla” SHPK është kryetari i bashkisë Librazhd, Mariglen Disha.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post