Kryebashkiaku i Librazhdit Mariglen Disha kujtohet në dimër për punët që duhet të kishte mbyllur para verës. Kështu, punimet për kanalet vaditëse i prokuron në vjeshtë që të kryhen në dimër.
Sot do të tregojmë për prokurimin më të fundit të Bashkisë Librazhd, që ka si objekt “Rikonstruksion i kanalit vaditës të Allanit, Dorez-Gizavesh –Librazhd Qendër”. Është një kanal i ndërtuar qysh para viteve ‘90, përdoret për të marrë ujin nga mali gjatë stinës së verës, në mënyrë që banorët e zonës të vadisin të mbjellat e tyre.
Prej disa vitesh ky kanal vaditës që është 11 km i gjatë dhe përshkon këto zona ka patur probleme me përcjelljen e ujit, për shkak të ndërhyrjeve të parregullta dhe mungesës së mirëmbajtjes.
Në dokument thuhet që pas viti 2021 është riparuar një pjesë e kanalit, ndërsa tani ka mbetur gjysma e tij, pra rreth 6 km që përshkon zonën Librazhd Qendër.
Për të riparuar anësoret e kanalit me një shtresë betoni, që të pengojë edhe rrëshqitjen, Disha planifikon të shpenzojë 526 milionë lekë. Është një projekt i domosdoshëm, por procedurat e tenderit na bëjnë të dyshojmë për fatin e fondit të caktuar.
Në hapjen e “garës” shfaqën interes 11 kompani, me oferta që varionin nga 340 milionë lekë në 510 milionë lekë. Ishin mundësitë e mira që të zhvillohej një garë konkurruese dhe të nisnin pa vonuar punimet për këtë kanal, që në fakt duheshin bërë më parë.
Por Disha i ka rënë me “sëpatë’, 5 ofertat më të lira i ka skualifikuar që në fazën e parë, menjëherë pas tyre edhe 5 oferta të tjera, duke lënë të vlefshme vetëm propozimin e dorëzuar nga bashkimi i operatorëve “RESTAURIM GURRA–KACA” SHPK – “VIANTE Konstruksion”. Oferta e tyre kishte vlerën 472 milionë lekë dhe renditej tek tri më të shtrenjtat.
Ky fakt përbën shkelje të kritereve, por kryetari Disha vazhdoi me firmosjen e kontratës me këta dy operatorë.
Duket si një dhuratë për bashkëqytetarët të tij biznesmenët Tahir Kaca dhe Skënder Gurra. Firma “RESTAURIM GURRA–KACA” është themeluar në vitin 2008 nga dy pronarët që selinë e parë të kompanisë e kanë të regjistruar në fshatin Dragostunjë.
Madje në atë zonë ndodhet edhe burimi i kanalit vaditës që sjell ujë për banorët e zonës, sigurisht përshkon edhe tokat e Gurrës dhe Kacës!
Përtej miqësisë së tyre, që nuk analizohet nga filtrat e Open Data Albania, kontrata është vlerësuar me “Flamur të kuq”, që është shenja e riskut të korrupsionit.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post