Një shqiptar mbeti i vrarë dhe 3 të tjerë u plagosën, pas një sulmi me armë që u krye ndaj tyre nga një grup marokenësh. Krimi ka ndodhur mbrëmjen e sotme në zonën e Aldo Moros në Frosinone të Italisë.
Raportohet se ngjarja ka ndodhur rreth orës 19:00 përpara një lokali, e cila në momentin e të shtënave ishte e mbushur me klientë.
Dyshohet se grupi i të rinjve nga Shqipëria është përballur me një grup tjetër marokenësh, të cilët mbërritën me makinë pranë lokalit dhe pas një debati me tone të larta hapën zjarr.
Sipas informacioneve të para, ngjarja mund të jetë një “larje hesapesh” mes bandave rivale: shqiptarëve dhe ndoshta marokenëve.
Debati ka shpërthyer pikërisht brenda lokalit dhe më pas është zhvendosur në rrugë ku dikush ka nxjerrë armën dhe më pas ka pasur një breshëri të shtënash.
Një e shtënë me armë zjarri e plagosi për vdekje të riun në qafë dhe ai vdiq pak më pas.
Tre të tjerët janë transportuar me kod të kuq në urgjencën e spitalit Spaziani. Njëri prej tyre do të ishte në sallën e operacionit, i goditur në gjoks dhe në këmbë.
Discussion about this post