Ministrja e Shëndetësisë, Ogerta Manastirliu ka zhvilluar sot një vizitë zyrtare në Kosovë, ku takoi zëvendësministren e Shëndetësisë së Kosovës, Dafina Gexha-Bunjaku bashkë me zëvendësministrin Arsim Berisha. Gjatë takimit diskutuan marrëveshje në fushën e shëndetësisë për rritjen e bashkëpunimit midis dy institucioneve të vendeve përkatese. Ministrja Manastirliu tha se bashkëpunimi dhe shërbimet shëndetësore midis dy shteteve duhet të rriten. Përveç bashkëpunimit ndërkufitar në shëndetësi, ajo përmendi edhe shërbimet e fushës së kardiokirurgjisë.
“Shqipëria ka hapur qendrën e dytë kardiokirurgjike, për të pasur më shumë mbulim në këtë drejtim. Patjetër që e mundëson lëvizjen të kardiokirurgëve për të ardhur në Kosovë”, pohoi ajo.
“Arsyeja dhe çështjet kryesore që u diskutuan në takimin e sotëm janë ndalur në dy marrëveshjet që presim të firmosen në mbledhjen e dy qeverive gjatë qershorit. Me dy marrëveshje që konsistojnë me bashkëpunimin mes dy spitaleve afër kufirit. Diskutuam edhe me shumë seriozitet për të gjitha çështjet që lidhen në sezonin turistik. Ne kemi siguruar që prej datës 15 qershor, qendrat shëndetësore verore të jenë në dispozicion të pushuesve dhe t’i shërbejnë me cilësi të gjithë pushuesit kosovarë.
Nga ana e saj, zëvendësministrja Gexha-Bunjaku theksoi gatishmërinë e palës kosovare për të kontribuar në bashkëpunimin në fusha të ndryshme në shëndetësi dhe për të vijuar me shërbime shëndetësore për qytetarët e veriut të Shqipërisë në spitalet dhe institucionet shëndetësore të Kosovës.
Discussion about this post