Ish-kryeministri i Italisë, Matteo Renzi ka reaguar lidhur me marrëveshjen e nënshkruar një ditë më parë mes Melonit dhe Ramës për ndërtimin e 2 qendrave të strehimit në Shqipëri, me qëllim për të menaxhuar fluksin e emigrantëve.
Renzi e shikon me skepticizëm këtë marrëveshje, ndërsa deklaron se deri tani Meloni ka dërguar në Shqipëri vetëm turistë.
Sipas tij, zgjidhja e vetme është që këta emigrantë të paligjshëm që kalojnë Mesdheun, të dërgohen në punë ndërsa çdo gjë tjetër tingëllon më shumë si reklamë.
“Le të shohim nëse kalojmë nga fjalët në veprime. Është qeveria që duhej të bllokonte zbarkimet. Për momentin në Shqipëri Meloni na ka dërguar turistë vetëm këtë verë. Të shohim nëse kjo zgjidhje do të funksionojë, unë vazhdoj të mendoj se ka vetëm një zgjidhje dhe ajo është dërgimi i këtyre njerëzve në punë. Ruajini në det dhe më pas dërgojini në punë. Pjesa tjetër më tingëllon si reklama, pastaj do të shohim nëse do të funksionojë. Më duket një zgjidhje mjaft teorike dhe jopraktike”, ka deklaruar Matteo Renzi.
Marrëveshja
Shqipëria nënshkroi dje një marrëveshje bashkëpunimi me Italinë për frenimin e valës së emigrantëve në shtetin fqinj.
Në bazë të marrëveshjes, Italia do të financojë dy qendra për të menaxhuar emigrantët pa lejeqëndrimi. Këto struktura fillimisht do të presin jo më shumë se 3 mijë persona që do të qëndrojnë aty kohën e nevojshme për të shqyrtuar kërkesat për azil. Do të qarkullojnë në vit deri në 36 mijë persona, natyrisht jo njëkohësisht, pasi kapaciteti maksimal i dy qendrave do të mbetet deri në 3000 vendstrehime.
Meloni deklaroi se në Portin e Shëngjinit do të ngrihet qendra për pritjen e refugjatëve që do të jetë nën juridiksionin e Italisë dhe një tjetër strukturë do të ngrihet në Gjadër për akomodimin e tyre, deri sa të shqyrtohen kërkesat për azil, ndërsa Shqipëria do të kontribuojë vetëm me sigurinë. Kjo qendër parashikohet që të jetë gati në pranverën e ardhshme.
Discussion about this post