Kryeministri i shkarkuar Dritan Abazoviç, ka shtruar mbrëmjen e djeshme një darkë për Patriarkun e Kishës Ortodokse Serbe, Porfirije, në qytetin Herceg Novi të Malit të Zi. Ka qenë zyra e shtypit të kryeministrit që ka publikuar foton e darkës.
“Në mbrëmje, së bashku me Kryeministrin dhe Patriarkun, morën pjesë Mitropoliti i Malit të Zi Joanikije, peshkopi i Dalmacisë, Nikodim, peshkopi i Zahum-Hercegovinës Dimitrije, Ministri i Drejtësisë, Marko Kovaç, Ministri i Financave, Aleksandar Damjanoviç, Sekretari i Shtetit në Ministrinë e Drejtësisë Bojan Bozhoviq dhe këshilltari i kryeministrit për çështje juridike Ivo Shoq”, thuhet në njoftimin zyrës së kryeministrit Abazoviç.
Patriarku Porfirije mbajti dje liturgji në një manastir afër Herceg Novit dhe udhëhoqi kortezhin e mbrëmjes. Theksojmë se Kisha Ortodokse Serbe e kundërshton fuqishëm pavarësinë e Kosovës, të shpallur në 17 shkurt, 2008.
Kujtojmë se Kuvendi i Malit të Zi votoi me 50 vota PRO rrëzimin e qeverisë, drejtuar nga kryeministri Dritan Abazoviç. Për shkak të një marrëveshje që bëri me Kishën serbe, kryeministri shqiptar i Malit të Zi u përball me mocion shkarkimi në Kuvend.
Discussion about this post