Presidenti i Serbisë, Aleksandër Vuçiç, ka reaguar pas zbatimit të marrëveshjes për targat të arritur në Bruksel mes dy vendeve dhe ka shprehur skepticizmin e tij lidhur me respektimin e marrëveshjes nga pala kosovare.
Vuçiç, ndër të tjera ka folur edhe për Asociacionin e Komunave me kompetenca ekzekutive ku ka deklaruar se nuk beson asgjë pasi e di me kë ka të bëjë.
“Nuk besoj se do e pranojnë Asociacionin. Nuk u besoj në asgjë sepse e di me kë kemi punë. Kurti ka thënë se Kosova e ka një problem të madh, që tashmë ka emër e mbiemër (Aleksandër Vuçiç). Nuk ka asnjë marrëveshje të lehtë për ne. S’ka asgjë të lehtë në Kosovë. Më 2008, ata shpallën pavarësinë dhe ajo njihet nga 90 për qind e shteteve të fuqishme. Që nga ajo kohë, mezi po e mbajmë hundën mbi ujë”, është shprehur ai.
Pas 13 ditësh bllokim e tension, Veriu i Kosovës i është rikthyer normalitetit. 2 tetori ka qenë dita dhe afati i tërheqjes së Njësive Speciale të Policisë dhe zhbllokimit të rrugëve për në Jarinje e Bërnjak sipas marrëveshjes së arritur nga Kosova e Serbia në Bruksel.
Pjesëtarë të KFOR-it janë parë pranë dy pikave kufitare. Në bazë të marrëveshjes Kosova dhe Serbia janë dakordësuar që të mbulojnë simbolet shtetërore në targat e automjeteve kur të hyjnë në territoret respektive.
