Vrasja e pronarit të marketit në Kamzë Agim Bucit, ishte e porositur. Kështu ka dëshmuar autori i krimit për ngjarjen e ndodhur në 2018.
Çka bie poshtë pista se ai dhe bashkëpunëtori i tij kishin shkuar në market për të grabitur, duke thënë se e kanë paguar për të kryer vrasjen e Bucit. Në seancën e mbajtur ditën e sotme në Gjykatën e Apelit në Tiranë Vladimir Kurti ka pranuar të bashkëpunojë me drejtësinë, ai ka treguar edhe emrin e porositësit që rezulton të jetë Albert Zaja. I penduari i drejtësisë është shprehur para trupës gjykuese se nuk kishte folur më herët për këtë fakt pasi i druhej një hakmarrje të mundshme të Zajës.
Më tej i dënuari përjetë shpjegon se armën e krimit ia ktheu po Zajës, e për këtë arsye ajo nuk gjendet, ndonëse pas vrasjes së Agim Bucit në Kamzë, policia devijoi lumin e Tërkuzit, pasi kishte dyshime se ishte hedhur aty.
Vladimir Kurti shpjegoi më tej, se nuk tregoi të vërtetën pas arrestimit, pasi kishte frikë për jetën e tij dhe të familjarëve, por tashmë që Albert Zaja është arrestuar, ai vendosi të rrëfehet. “Kam patur frike te flas deri me tani sepse me kane kercenuar”, deklaroi i pandehuri. Edhe bashkë I pandehuri tjetër, Rruzhdi Hoda konfirmoi të njëjtën dëshmi.
Në këto rrethana Gjykata e Apelit i është drejtuar me një shkresë Prokurorisë së Rrethit Gjyqësor Tiranë nëse ka regjistruar ndonjë procedim penal në lidhje me Albert Zajën. Vendimi i gjykatës me gjasë do të prishet në mënyrë që çështja të kthehet për rihetim dhe rigjykim duke pasur parasysh rrethanat e reja.
Discussion about this post