Këtë të shtunë Teuta do të përballet në orën 14:45 me Egnatian në ndeshjen e javës së gjashtë të Superligës.
Duke folur në prag të kësaj sfide, trajneri i ‘Djemve të detit’, Edi Martini ka thënë se kritikohen shpesh herë për mungesë golash.
“Pësoni shumë gola? E shoh gjithmonë gjysmë-plot gotën. Gjithmonë na kritikoni se nuk bëjmë gola, këto javë kemi shënuar dhe pjesa tjetër do rregullohet me kalimin e kohës.”-tha ai.
Më tej tekniku shtoi se ndeshja me Egnatian ka për të qenë shumë e vështirë, duke theksuar edhe se deri më tani nuk kanë zhvilluar asnjë takim në fushën e tyre dhe kjo është një nga shkaqet e kësaj situate.
“Egnatia? Do jetë ndeshje e vështirë. Janë ekip i fortë, nuk lënë hapësira dhe qarkullojnë topin. Shoh ndeshje të luftuar dhe të fortë. Çdo ndeshje kemi luajtur në fushë asnjëanëse, mjafton të jetë fusha e mirë të qarkullojë topi. Këtë sezon nuk kemi luajtur në fushën tonë. Në çdo ndeshje shkojmë për tri pikë. Kjo është filozofia jonë edhe për ndeshjen e radhës. Kemi punuar në anën psikologjike, kemi biseduar me skuadrën duke vënë në dukje gabimet. Në futboll ndodhin këto por nuk duhet t’i përsërisim”,-theksoi Edi Martini.
Aktualisht këto skuadra kanë të dyja nga tetë pikë duke u renditur Teuta në vend të katërt dhe Egnatia në vendin e pestë të tabelës së Superligës./K.T/Gijotina.com
