Ish-Kryeministri Sali Berisha, përmes avokatëve të tij, Genc Gjokutaj dhe Sokol Mëngjesi, i është drejtuar Gjykatës së Lartë, për të ndryshuar masën e sigurisë ndaj tij, atë të arrestit të shtëpisë, vendosur më 30 dhjetor nga GJKKO dhe lënë në fuqi edhe nga Apeli i Gjykatës Speciale.
Në seancën që u mbajt më 25 janar, gjyqtarja Ilirjana Olldashi shpalli vendimin, ndërkohë që vetë Berisha nuk ishte i pranishëm.
Berisha ka zhvilluar vetëm një seancë në SPAK, më 23 janar, ku dhe iu përgjigj prokurorëve mbi dosjen Partizani.
Ish-kryeministri gjithashtu kërkon që të lejohet që të marrë pjesë në punimet e Kuvendit, dhe në seancën e mbajtur më 1 shkurt u vendos shtyrja për në datën 8 shkurt.
Shkak sipas gjyqtarëve ishte fakti se Berisha nuk ka marrë njoftim për seancën, pasi letrën e njoftimit e ka firmosur e bija, Argita Malltezi.
Por, sipas avokatit Genc Gjokutaj, ky është një paradoks i togave të zeza, që “kanë për qëllim djegien e mandatit të Berishës”.
Mbrojtja gjithashtu këmbëngul për përjashtimin e gjyqtares Irena Gjoka, me arsyetimin se është në konflikt interesi me ish-kryeministrin.
Discussion about this post