Seanca për vlerësimin e masës së sigurisë në GJKKO për ish-kryeministrin Sali Berisha do të mbahet ditën e martë në orën 14:00. Nga raportimet në këtë seancë, gjithmonë nëse ish-Kryeministri paraqitet, Prokurorët e SPAK do e pyesin lidhur me privatizimin e kompleksit Partizani.
“Gjykata e Posaçme e Shkallës së Parë për Korrupsionin dhe Krimin e Organizuar, në datën 24.10.2023, ditë e Martë, ora 14:00, ka caktuar seancën gjyqësore të marrjes në pyetje të personit nën hetim Sali Berisha, bazuar nenit 248 pika 1 të K.Pr.Penale”, thuhet në njoftimin zyrtar të GJKKO.
Të shtunën, SPAK ka arritur që të formalizojë masën e sigurisë “detyrim paraqitje” dhe ndalim të daljes jashtë vendit për deputetin Sali Berisha, ndërkohë që është arrestuar dhëndri i tij, Jamarbër Malltezi.
Zhvillimet e fundit kanë lidhje me hetimet që SPAK ka kryer lidhur me privatizimin e ish-kompleksit Partizani.
Berisha në daljet publike e ka cilësuar arrestimin e dhëndrit të tij si një hakmarrje politike, ndërsa akuzoi Kryeministrin Edi Rama dhe bashkëshorten e këtij të fundit, Linda Rama.
Berisha gjithashtu ka deklaruar se në rastin e tij, SPAK vendosi dy masa ndaluese, pa marrë më parë leje nga Kuvendi.
Në dy raste oficerë të Policisë së Shtetit, njëherë mbrëmjen e së shtunës, dhe njeherë pasditen e sotme, kanë tentuar të kontaktojnë ish-Kryeministrin me qëllim për ta njoftuar për masat e vendosura ndaj tij. Në të dy rastet, sipas raportimeve, ata nuk kanë mundur të kontaktojnë me Berishën, i cili ka deklaruar se nuk ka ndërmend të njohë një vendimmarrje nga SPAK që bie ndesh me Kushtetutën.
Në krah të Berishës, përsa i takon procedurës së ndjekur nga SPAK, ka dalë edhe kreu i Grupit Parlamentar të PD-së, Gazment Bardhi. Ky i fundit kërkoi që SPAK të respektonte ligjin dhe Kushtetutën, duke iu drejtuar Kuvendit me një kërkesë, sikundër ndodhi edhe me rastet e mëparshme.
Nuk dihet pse SPAK dhe më pas GJKKO kanë vendosur dy masa ndaluese ndaj ish-Kryeministrit, që zotëron edhe mandatin e deputetit, duke shpërfillur procedurat ligjore. Për të legjitimuar vendosjen e masave të sigurisë, SPAK duhej ti drejtohej Kuvendit me një kërkesë, ashtu sikundër ndodhi në rastin e ish-zv.Kryeministrit Arben Ahmetaj.
Discussion about this post