Gjykata e Shkallës së Parë në Shkodër vendosi sot masën e sigurisë “arrest me burg” për 28-vjeçarin Ragip Gila, i dyshuar si autor i masakrës me dy të vrarë dhe dy të plagosur, e ndodhur mëngjesin e së hënës në një lokal në qendër të qytetit.
Sipas burimeve nga gjykata, gjatë seancës për caktimin e masës së sigurisë, Gila nuk dha asnjë prononcim për ngjarjen. Ndërkohë, në dëshminë e parë pas arrestimit ai ka deklaruar se shënjestra e tij ishte 44-vjeçari Erogen Vaso, i cili mbeti i plagosur.
28-vjeçari Gila u prangos nga forcat “Shqiponja” rreth një orë pas krimit. Në momentin e ndalimit iu sekuestruan dy armë zjarri (një automatik dhe një pistoletë), një jelek antiplumb, një skafandër, një maskë, si dhe një shishe 1,5 litra me lëndë djegëse. Po ashtu, si prova materiale u sekuestruan automjeti i vjedhur që autori përdori për t’u larguar nga vendi i ngjarjes dhe një motomjet pa targa e pa numër shasie, i braktisur në vendin e krimit.
Policia ka shpallur në kërkim edhe dy persona të tjerë, 39 dhe 17 vjeç, që dyshohen si bashkëpunëtorë të Gilës. Ata akuzohen për veprën penale “Sigurimi i kushteve dhe mjeteve materiale për të kryer vrasje”.
Ragip Gila kishte dalë nga burgu vetëm gjashtë muaj më parë, pas dy vitesh vuajtje dënimin për mbajtje arsenali armësh dhe lëndësh shpërthyese në banesën e tij.
Discussion about this post