Vetëm pak ditë nga masakra e Velipojës ku mbetën të vrarë 4 persona dhe 2 të tjerë u plagosën rëndë, grupet hetimore kanë hedhur dritë mbi dinamikën e kësaj ngjarjeje. Hetuesit kanë gjetur në tarracën e hotelit “Gocaj”, 22 gëzhoja arme, aty ku edhe ndodhi konflikti i armatosur mes dy pronarëve të hoteleve. Sipas hetimeve, gëzhojat mësohet të kenë dalë nga disa lloje armësh që janë përdorur nga viktimat. Kështu në vendin e ngjarjes janë gjetur 13 gëzhoja arme zjarri pistolete, 5 gëzhoja armë zjarri automatiku, 1 fishek armë zjarri pistoletë me kapsollë të pagoditur si dhe 3 predha arme zjarri të dëmtuara pjesërisht. Sakaq theksojmë se deri më tani janë sekuestruar dy armë zjarri pistoletë, njëra e llojit TT, dhe një tjetër miniglok e cila është gjetur në tarracën e hotelit Gocaj. Megjithatë policia ende nuk ka sekuestruar një armë zjarri automatik e cila gjithashtu dyshohet të jetë përdorur nga autorët dhe viktimat pas konfliktit. Ndërkohë ekspertiza zbuloi se njëri nga vëllezërit, përkatësisht E. Gocaj u vra me 1 plumb në kokë, vëllai i tij, Xh. Gocaj me disa plumba në pjesë të ndryshme të trupit ndërsa 20 vjeçari M. Zeneli humbi jetën nga 1 plumb në kraharor. Ky i fundit, jetim kishte filluar të punonte si kamerier në hotelin “Gocaj”, por çdo gjë mori kthesë për të, pasi u desh që dita e parë e punës të ishte e fundit e jetës së tij. Edhe pse nuk ishte përfshirë në konfliktin e dy pronarëve për një “copë” rërë në plazhin e Velipojës, breshëritë e plumbave nuk e kanë kursyer as jetën e 20-vjeçarit Zeneli, i cili planifikonte një jetë me të ardhura ekonomike më të mira për nënën e tij. Ndërkohë i arrestuari H. Ferracaku ka marrë një plumb në dorë ndërsa 17 vjeçari ka marrë një plumb në pjesën e gjurit.
Ja si nisi konflikti
Nga skena që grupet hetimore kanë ngritur për zbardhjen e kësaj ngjarjeje, mësohet se kanë qenë Farracakajt që kanë qëlluar të parët me breshëri plumbash drejt vëllezërve Gocaj, në hotelin në pronësi të këtyre të fundit. Po ashtu, ekspertiza e policisë në Shkodër ka ngritur prova të forta se i arrestuari 54-vjeçari H. Ferracaku së bashkë me djemtë dhe nipin e tij kanë qëlluar të parët me armë zjarri drejt dy vëllezërve Gocaj si dhe kamerierit 19-vjeçar Musaen Zeneli. I arrestuari H. Ferracaku ka hapur zjarr i pari drejt E. Gocaj me armë zjarri, duke e lënë të vdekur në vend. Ndërkohë në këto momente në aksion ka hyrë vëllai i këtij të fundit Xh. Gocaj i cili dyshohet të ketë qenë disa metra më larg dhe ka qëlluar në drejtim të K. Ferracakut, duke e lënë të vdekur. Ndërsa ka plagosur edhe H. Ferracakun dhe E. Dylin nipin e viktimës. Por “beteja” nuk ka mbaruar me kaq, edhe pse i plagosur në njërën dorë, H. Ferracaku ka qëlluar edhe në drejtim të Xh. Gocaj dhe kamerierit 19 vjeçar duke i lënë të vdekur. Megjithatë për detajet e zbuluara nga grupi hetimor që bien ndesh me deklaratën e parë të dhënë nga i arrestuari H. Ferracaku pritet që ky i fundit të merret sërish në pyetje si dëshmitari i vetëm që i mbijetoi masakrës. Pasi Ferracaku dy ditë më parë dëshmoi nga Spitali i Traumës se kanë qenë Gocajt ato të cilët kanë qëlluar fillimisht vëllanë e tij duke e lënë të vdekur në vend me tre plumba në kraharor.
