Opozita ka publikuar një tjetër provë që sipas saj fakton masakrën elektorale të 14 majit. Prova e fundit e publikuar nga Lefter Maliqi, i cili garonte për kryebashkiak të Kuçovës, hedh dritë mbi zhdukjen e procesverbaleve origjinale të numurimit të votave.
Dhe kjo provë bazohet në dëshminë e një prej anëtarëve të grupeve të numërimit të votave në KZAZ-në e Kuçovës.
Në dëshminë e tij, anëtari që pretendon se ka qenë përfaqësues i subjektit politik Partia Socialiste thotë se urdhri për zhdukjen e këtij procesverbali është dhënë nga kryetari i bashkisë Kuçovë, Kreshnik Hajdari dhe i zbatuar nga kryetari dhe sekretari i KZAZ-së.
Po ashtu, “i penduar” në dëshminë e thotë se nuk e ka zbatuar këtë urdhër dhe i ka ruajtur materialet origjinale duke shtuar se është gati t’ia vërë në dispozicion edhe institucioneve të drejtësisë për të dëshmuar atë çfarë ka ndodhur në të vërtetë në zgjedhjet e 14 majit në Bashkinë e Kuçovës, ku dhe vetë kandidati i koalicionit opozitar “Bashkë Fitojmë”, Lefter Maliqi e ka çuar këtë çështje në SPAK për hetim.
Ka qenë vetë Maliqi i cili ka publikuar video-dëshminë.
Në komentin që shoqëron pamjet, ai shkruan:
“Mirënjohje të pakufishme mediave për këtë publikim e denoncim, mirënjohje socialistëve të ndershëm për këtë denoncim dhe për çdo mbështetje që me dhanë me votë masive. Tre kallëzime janë bërë në SPAK kundra Oligarkut Pëllumb Hajdari, pengut të tij Kreshnik Salillari dhe komisionierëve të KZAZ, të qendrave të votimit dhe numërimit. KQZ, KAS, Kolegji zgjedhor, SPAK, Prokuroria e Përgjithshme të veprojnë. Faktori ndërkombëtar është vënë në dijeni për këtë krim shtetëror dhe elektoral. Njoftuam OSBE-ODHIR, ambasadat e huaja etj. S’do ndalemi deri në zbardhjen e së vërtetës në rrugë politike, ligjore dhe ndërkombëtare. Ndëshkim ligjor dhe këmbëngulje për zbardhjen e të vërtetës. Bashkinë e grabitur do ja kthejmë qytetarëve”.
VIDEO-DËSHMIA e anëtarit të numërimit të votave
“Kam qenë tek procesi i numërimit (të votave) në Kuçovë me Partinë Socialiste. Ditën e numërimit më është dhënë urdhri që të zhdukim procesverbalin origjinal të mbylljes së kutisë. Kjo është dhënë me urdhër nga kryetari i Bashkisë dhe na është njoftuar nga kryetari i KZAZ-së, Erald Isai dhe gjithashtu nga Sekretari, Romeo Ariu. Ne e kemi bërë këtë gjë, i kemi hequr procesverbalin origjinal nga kutitë dhe që nga ajo natë e deri më sot e kam vuajtur këtë gjë dhe kam qenë gjatë gjithë kësaj kohe me frikën se mos e vërteta do të dali në shesh edhe që do të dënoheshin për këtë gjë që ne kemi bërë me urdhër të këtyre personave”, tregon ai.
“Mua për këtë gjë më ka vrarë ndërgjegja dhe dua që të dalë e vërteta në shesh, dhe të gjithë autorët e kësaj gjëje të ndëshkohen, qoftë edhe unë vetë. Nga e gjitha kjo, e vetmja gjë që nuk jam bërë pishman është që procesverbalet që na u urdhëruan që të hiqen, unë i kam mbajtur dhe i kam gati që t’ia postoj të gjithë institucioneve në vend”, shton më tej.
Discussion about this post