Policia greke arrestoi në aeroportin “Eleftherios Venizelos” në Athinë një shtetas turk, i cili mbante një pasaportë false, dy karta identiteti false dhe plumba.
Autoritetet po hetojnë përfshirjen e tij të mundshme në të shtënat në Loutsa që rezultuan në gjashtë të vdekur.
Konkretisht, sipas raportimeve, gjithçka ka ndodhur dje të hënën (11/9) rreth orës 20.35 kur EL.AS. është informuar se pas një ekzaminimi me rreze X (X-RAY) në bagazhin e dorës, i janë gjetur sende të ngjashme me gëzhojat e armës.
Menjëherë në vendngjarje kanë mbërritur efektivët e policisë, të cilët kanë konstatuar se burri po nisej për në Mitilene, ndërsa brenda qeses së letrës që mbante kishte katër gëzhoja 9 mm. Gjithashtu, atij iu gjetën edhe dy karta identiteti portugeze të falsifikuara.
Ndërkohë prova të reja për masakrën po dalin në dritë nga protothema.gr. Sipas informacioneve, një nga viktimat e pritës vdekjeprurëse, me kombësi turke, është përplasur me autoritetet greke për hyrje të paligjshme në vend.
Në të njëjtën kohë, burime nga Policia Helenike, duke folur për protothema.gr, thanë se identifikimi i shumicës së viktimave ende nuk ka përfunduar.
Nga provat e mbledhura deri më tani, raportohet se viktimat ishin turq dhe kishin karta identiteti franceze, ndërsa burime të mirëinformuara thonë se ende po shqyrtohet nëse këto dokumente janë origjinale.
Raportet tregojnë se ka shumë gjasa që ata t’i përkasin një grupi aktiv në trafikun e drogës në disa vende, përfshirë Greqinë dhe Francën.
Po ashtu, të njëjtat burime thonë se ende nuk mund të konkludohet se gjashtë personat e gjetur të vdekur, të gjithë i përkisnin të njëjtit grup. “Ende nuk është e sigurt që burrat e gjetur të vdekur janë të gjithë nga i njëjti grup. Ndoshta disa prej tyre ishin nga kampet rivale”, vunë në dukje qarqe me njohuri për rastin.
Discussion about this post