Atentati me 1 viktimë e 4 të plagosur në zonën e Don Boskos në Tiranë, vazhdon të jetë pa autorë. Grupet hetimore nuk kanë ende asnjë gjurmë që mund të çojë në identifikimin e tyre. Edhe pse ngjarja e rëndë ka ndodhur në një zonë të populluar të kryeqytetit i monitoruar me kamera sigurie, shpresa për të identifikuar autorët mbetet dëshmia e të plagosurve.
Policia ka marrë sot në pyetje Edmond Crrojin, daja i 35-vjeçarit Erion Çela që u ekzekutua me breshëri plumbash. Burime bëjnë me dije për se është pyetur edhe vëllai i viktimës Blerim Çela.
Ata pretendojnë se nuk kanë konflikte me njeri dhe nuk ia kanë idenë se kush janë autorët. Megjithatë kjo deklaratë nuk i ka bindur hetuesit dhe ka dyshime se konflikti mes palëve ka nisur për shkak të pazareve të prishura të drogës.
Policia po ekzaminon edhe automjetin e Crrojit dhe banesat e të plagosurve, por nuk janë gjetur sende të kundraligjshme që mund të vihen në funksion të hetimit.
Gjithashtu policia e Tiranës ka kërkuar që të kontrollohen makina të ngjashme me atë të autorëve pasi ka dyshime se i kanë ndërruar targat dhe e kanë nxjerrë sërish në qarkullim për të humbur gjurmët.
Discussion about this post