Një 37-vjeçar shqiptar, i cili goditi 20 herë me një thikë me teh 20 cm bashkëshorten e tij, me të cilën kishte 3 fëmijë, u dënua me burgim të përjetshëm nga Gjykata Rajonale e Aachen në Gjermani.
Besmir Ademi kreu krimin më 20 maj 2023, në një parking, ndërsa filmoi bashkëshorten e tij teksa jepte shpirt.
Pavarësisht se u pendua për krimin e rëndë, Ademi nuk shpëtoi nga burgimi i përjetshëm, edhe pse ka një mundësi që pas 15 vitesh të kërkojë lirimin nga burgu.
Gjithsesi aktgjykimi nuk është përfundimtar. Shqiptari, gjatë gjykimit, pohoi se kreu krimin pasi nuk donte të pranonte ndarjen nga gruaja, Jetmira Beka (28-vjeçe).
“Fëmijët i kam lënë jetimë. Do të bëja gjithçka për ta zhbërë. Nuk e mbaj mend aktin. Ka vetëm një vrimë të madhe të zezë”, pohoi ai.
Ditën e krimit, Besmir Ademi kishte marrë masa që të takohej me viktimën në një parking të Obit për t’ia dorëzuar gruas së tij një nga tre fëmijët. Por në vend të vajzës së tij ai erdhi me një thikë kasapi.
Sipas prokurorisë, ai e ka goditur 20 herë me thikë gruan e tij, duke e lënë të vdekur në vendin e ngjarjes. Gjashtë nga goditjet me thikë ishin fatale, u tha në gjykatë. Disa kocka u thyen nga forca e goditjes. Motra e saj tentoi të ndërhynte por u plagos lehtë. Disa klientë në dyqanin e pajisjeve dëshmuan sulmin e tmerrshëm.
Ajo që është e pabesueshme; pas aktit të përgjakshëm, vrasësi mësohet se ka filmuar me celular gruan e tij deri sa dha shpirt dhe njëkohësisht ka buzëqeshur. Celulari dhe arma e vrasjes nuk u gjetën kurrë.
I pandehuri, i cili nuk kishte asnjë dënim të mëparshëm, ishte xheloz dhe ushtronte “sjellje të padurueshme kontrolluese” ndaj gruas me pasaportë gjermane dhe kosovare.
Ai ishte i dëshpëruar, “i shoqëruar me zemërimin e pakufishëm që ajo kishte guxuar t’i shmangej zotërimit të tij”.
Discussion about this post