Porkuroria e Korçës ka lëshuar urdhër arresti për Ilirjan Selmanin, i dyshuari kryesor për vrasjen e 52-vjeçares Kozeta Teço e gjetur ditën e sotme në banesën e saj të djegur pa shenja jete.
Selmani dyshohet se kishte lidhje intime me viktimën prej vitesh dhe se gjatë kësaj kohe, ai i ka marrë 52-vjeçares 20 milionë lekë të vjetra. I ndaluar ditën e sotme nga policia, Selmani ka deklaruar fillimisht se kishte 10 ditë që nuk fliste me Kozeta Teçon, por kur është ballafaquar me pamjet e kamerave të sigurisë, ka pranuar se në mëngjes kishte qenë në shtëpinë e 52-vjeçares. Një biznes “fast food” ndodhet pranë shtëpisë në Pogradec dhe kamerat e tij kanë fiksuar Ilirjan Selmanin duke dalë nga shtëpia e Kozetës mëngjesin e sotëm.
Kozeta Teço është gjetur me plagë të shkaktuara nga mjet prerës në qafë dhe krahë, të cilët dyshohet se i kanë shkaktuar dhe vdekjen. Sakaq, Ilirjan Selmani me qëllim fshehjen e ngjarjes, i ka vendosur flakën shtëpisë që vdekja e saj të dukej aksidentale nga asfiksia.
Ndërkohë në koshin përpara shtëpisë së viktimës, janë gjetur peshqirë dhe rroba me njolla gjaku, të cilat dyshohet se Ilirjan Selmani i ka përdorur për të fshirë gjurmët e krimit.
Pas vrasjes së kryer ditën e sotme, Ilirjan Selmani është takuar me disa të njohur të tij, të cilëve u ka pohuar se kishte vendosur të ndahej nga Kozeta Teço, duke pretenduar se ajo kishte krijuar një lidhje tjetër.
Hetuesit dyshojnë se këto deklarata janë bërë me qëllim për të krijuar një alibi dhe për të shmangur dyshimet për vrasjen që kishte kryer. Burimet bëjnë me dije se Teço dhe Selmani kanë pasur një debat të ashpër në orët e para të mëngjesit të sotëm dhe aty dyshohet se 52-vjeçarja është vrarë.
Gjithashtu theksojmë se autori i dyshuar i krimit njihet nga autoritetet si përdorues i lëndëve narkotike, i cili shpesh herë ka shfaqur shenja ankthi e depresoni. Nga ana tjetër dhe viktima gjatë kohëve të fundit ka shfaqur probleme të theksuara të shëndetit mendor.
Discussion about this post