Duke nisur nga 14 shtatori, Mali i Zi aplikon masa të reja antiCovid, për qytetarët që duan të udhëtojnë në shtetin fqinj.
Lajmin e ka bërë të ditur Ministria për Europën dhe Punët e Jashtme, e cila shkruan se në kufi udhëtarët duhet të kenë vërtetim që kanë kaluar 14 ditë nga rivaksinimi, për vaksinat që jepen me dy doza, ose kanë kaluar 14 ditë nga vaksinimi për vaksinat që jepen me një dozë.
Për qytetarët që nuk janë vaksinuar ende, duhet të paraqesin një test PCR negativ Covid-19 jo më të vjetër se 72 orë, ose testin pozitiv PCR nga i cili kanë kaluar të paktën 14 ditë, ose një test negativ antigjen, jo më të vjetër se 48 orë.
Qytetarët e Malit të Zi dhe shtetasit e huaj me qëndrim të përkohshëm në Mal të Zi, të cilët nuk plotësojnë asnjë nga kushtet e e mësipërme, duhet të karantinohen. Izolimi mund të ndërpritet pas një testi PCR negativ, pas ditës së gjashtë nga kalimi i kufirit.
Personat nën moshën 18 vjeç (shtetas malazezë, apo të huaj) nuk i nënshtrohen këtyre rregullave.
