Radhë të gjata automjetesh janë krijuar në pikën kufitare të Morinës si pasojë e masave të reja anti-Covid që hynë sot në fuqi.
Burime për Gijotina.com, shprehen se dhjetëra autobusë qëndrojnë në radhë nga Kosova për në Shqipëri, me të moshuar që janë nisur për në llixhat e Elbasanit.
Sipas masave të reja, të gjithë qytetarët që duan të futen në Shqipëri duhet të kenë me vete ose pasaportën e vaksinimit, testin PCR negativ ose testin e shpejtë të antigjenit.
Këto rregulla janë të vlefshme edhe për ata qytetarë të cilët kalojnë tranzit në Shqipëri. Fëmijët deri në 6 vjeç nuk i nënshtrohen këtyre rregullave.
Qytetarët shqiptarë rezidentë në Shqipëri, të cilët kthehen dhe nuk kanë një nga dokumentet e sipërcituara, duhet të vetë izolohen për 10 ditë dhe të informojnë autoritetin shëndetësor për të kryer një test në fund të periudhës së izolimit.
Kujtojmë se masat e reja anti-Covid u morën nga Komiteti Teknik i Ekspertëve më 30 gusht pas një shtimi të vazhdueshëm të rasteve të reja të infektimeve.
