Kryebashkiaku i Tiranës përbën zyrtarin më tipik që e ka shndërruar mashtrimin dhe propagandën në art. Thuajse në çdo dalje publike, nëpërmjet kasetave të parafabrikuara, Erion Veliaj nuk harron asnjëherë të flasë për “40 shkollat e reja” që ai dhe administrata e tij ofrojnë për fëmijët e kryeqytetit.
Për këdo që jeton në Tiranë, sidomos për prindërit e fëmijëve, është shumë e qartë se e gjithë kjo propagandë e Veliajt është vetëm një mashtrim ordiner.
Shembuj ka plot. Por “Gijotina” ka zgjedhur dy raste më tipike. Në janar të vitit 2023, kryebashkiaku Veliaj i shfaq në kantierin e ndërtimit të shkollës “Emin Duraku”, e cila gjendet në zemër të ish-Bllokut.
Shkolla 9-vjeçare u dëmtua nga tërmeti i 26 Nëntorit 2019 dhe u vendos që ajo duhej rindërtuar. Financimi i punimeve për godinën e re janë marrë përsipër nga Bashkimi Europian, në kuadër të projektit “EU for School”, i cili përmbledh një fond të Unionit, të përcaktuar për infrastrukturën shkollore në Shqipëri, të dëmtuar nga tërmeti i 4 viteve më parë.
Veliaj, në daljen e tij në fillim të këtij viti në territorin e “Emin Durakut”, deklaroi plot pompozitet se punimet do të mbylleshin në një afat 6-mujor. “Mezi pres t’i japim një çikë gaz këto kohë, sa kemi edhe kohë të mirë, të sigurohemi që çunat dhe gocat, engjëjt e vegjël të Njësisë 5, në shtator futen te shkolla e re,” deklaroi ai gjatë prezantimit të punimeve tek “Emin Duraku”.
Diçitura: Propaganda e Veliajt për shkollën “Emin Duraku”, sipas kasetave të gatshme të Bashkisë Tiranë
Por, kaloi shtatori, kaloi edhe tetori dhe “ëngjëjt e vegjël” nuk janë futur tek “Emin Duraku”. Përkundrazi, punimet po vijojnë ende dhe nuk dihet kur do të përfundojnë.
Diçitura: Shkolla “Emin Duraku” vijon të jetë në ndërtim
Pak ditë më parë, e konkretisht në 18 Tetor 2023, Këshilli i Rregullimit të Territorit (KRRT), nën drejtimin e kryeministrit Edi Rama, mori vendimin “Për miratimin e shtyrjes së afatit për objektin: “Rikonstruksioni i shkollës 9-vjeçare “Emin Duraku”, me vendndodhje në Bashkinë Tiranë, me zhvillues Bashkinë Tiranë.”
Diçitura: Vendimi i KRRT-së, dt. 18 Tetor 2023, për shtyrjen e afatit të punimeve për shkollën “Emin Duraku”
Ky vendim dëshmon më së qarti se shkolla “Emin Duraku” është larg përfundimit të saj, duke e nxjerrë Veliajn thjesht një mashtrues të rëndomtë, i cili nuk mban asnjë lloj përgjegjësie për premtimet butaforike që bën kohë pas kohe.
Rasti i mashtrimit për shkollën “Emin Duraku” dyfishohet me një tjetër premtim të pambajtur të kryebashkiakut të Tiranës.
Në Korrik të këtij viti, ai shpërndau sërish kasetat e tij të gatshme, ku deklaronte se “Është vërtet mëkat të mundohesh t’i gjesh një mënyrë alternative sistemit online për ta regjistruar fëmijën në një shkollë tjetër, kur shkolla “Xhezmi Delli” është më afër. Ne vërtet mund të jemi gati në fillim të shtatorit ose në fillim të tetorit, por për dy javë nuk ia vlen ta çosh fëmijën në një shkollë tjetër, ndërkohë që shkolla e re po mbaron dhe është në kushte shumë herë më të mira se shkollat bujtëse”.
Diçitura: Propaganda e Veliajt për shkollën “Xhezmi Delli”, sipas kasetave të gatshme të Bashkisë Tiranë
Edhe në këtë rast, mashtrimi doli shumë shpejt. Me kërkesë të Veliajt, Këshilli i Rregullimit të Territorit vendosi në 18 Dhjetor vendimin “Për miratimin e shtyrjes së afatit për objektin: “Rindërtimi i shkollës “Xhezmi Delli”, me vendndodhje Njësia Administrative 3, Rruga “Ali Baushi” dhe “Arben Minga”, Bashkia Tiranë, me subjekt zhvillues Bashkinë Tiranë”.
Diçitura: Vendimi i KRRT-së, dt. 18 Tetor 2023, për shtyrjen e afatit të punimeve për shkollën “Xhezmi Delli”
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post