Zbardhet skema e Call Centerave: 50 mln € në Tiranë, 10 të arrestuar dhe 4 në kërkim (EMRAT+VIDEO) -

Një hetim 2-vjeçar i Prokurorisë së Tiranës, në bashkëpunim me autoritetet austriake, goditën 3 call centera në 12 zyra kryeqytet, që kanë mashtruar me mijëra qytetarë evropianë të cilët kanë humbur deri në 50 milionë euro. 10 persona u arrestuan, disa organizatorë e disa në flagrancë, dhe 4 u shpallën në kërkim. Në aksion, u sekuestruan 900 mijë euro cash, ndërsa në zyrat e call center u gjetën edhe 80 operatorë të cilët u morën në pyetje dhe iu sekuestruan celularët.

Vetëm 100 metër larg qendrës së Tiranës, në hyrje të rrugës së Kavajës, në 3 kate të kësaj godine shumëkatëshe ishte ngritur një rrjet gjigand i mashtrimit të qytetarëve evropianë përmes call center-ave. Efektivët e Policisë së Tiranës, të hënën në mbrëmje, ruajnë godinën teksa agjentë të Krimit Kibernetik, prokurorisë së Tiranës dhe partnerë ndërkombëtarë, bastisin zyrat. Nga aty, dolën me çantat plotë me prova.

Brenda zyrave u gjetën 80 operatorë telefonikë, që u shoqëruan për t’u marrë në pyetje. Atyre iu sekuestruan edhe celularët. Njëkohësisht, të tjerë efektivë ishin në 2 call center të zbuluar pranë Kopshtit Zoologjik.

7 urdhër arreste u lëshuan në total me urdhër të Prokurorisë së Tiranës për mashtrim kompjuterik, për persona të dyshuar si kryesorët e skemës, të cilëve iu kontrolluan edhe banesat. Policia arriti të ekzekutojë 5 masa Eduard Dalla, Mateo Hoxha, Tedi Agastra, Ledio Toçi dhe Xhoel Mekolli, ndërsa 2 të tjerë, u shpallën në kërkim Marsel Lami dhe Xhoni Hitaj, ky i fundit i arrestuar më parë për vrasje me dashje të mbetur në tentativë. Për 2 persona të tjerë u vendos masa e ndalimit për të dalë jashtë vendit, por u ekzekutua vetëm për Aida Voklin 33 vjeç.

Dy prej tyre Tedi Agastra, i hetuar edhe më parë për skema mashtrimi, dhe Mateo Hoxha 24 vjeç dyshohet se konvertonin shumat që i vidheshin qytetarëve evropianë, në portofole kriptomonedhash, për të fshehur gjurmët e parave.

Burime nga grupi hetimor, thanë se të arrestuarit janë administratorë të call center-ave mashtrues, punonjës IT, që merren me ngritjen dhe menaxhimin e sistemeve që zhvasin të huajt, të tjerë mirëmbajtës interneti dhe financierë.

Kur policia ndërhyri në këto call center-a, arriti të gjejë në to, edhe 5 persona, të cilët u prezantuan si individë me peshë në strukturën e aktivitetit kriminal, në rolin e drejtuesve të ekipeve. Ata u arrestuan në flagrancë. Një tjetër me funksione të tilla, një 24-vjeçar, u shpall në kërkim.

23-vjeçari Tedi Agastra, sipas burimeve nga organi i akuzës rezulton i dyshuar për veprën penale “ushtrim pa licencë i veprimtarisë financiare”. Ai është arrestuar edhe më herët, në 2024-ën, në një grup me kryefinancierin e televizionit “Syri Tv”, Evis Sopi, i cili kishte një Exchange që dyshohej se e përdorte për të këmbyer kriptomonedhat në para cash.

Gjatë kontrolleve në 3 call center të shpërndarë në 12 zyra, agjentët sekuestruan gati 900 mijë euro cash, si kompjuterë, USB, servera dhe kamera sigurie.

Hetimet zgjatën 2 vite me radhë, kohë gjatë se cilës u mblodhën prova e dëshmi nga qytetarë evropianë të mashtruar, dhe u bashkëpunua me autoritetet austriake.

Aktualisht nën hetim po mbahen dhe disa baza të tjera të dyshuara se shërbejnë si call center mashtrimi në kryeqytet.

Në pranga

Eduart Dalla (masa e sigurisë e ekzekutuar)

Mateo Hoxha (masa e sigurisë e ekzekutuar)

Tedi Agastra (masa e sigurisë e ekzekutuar)

Ledio Toçi (masa e sigurisë e ekzekutuar)

Xhoel Mekolli (masa e sigurisë e ekzekutuar)

Kristjan Buda (arrestuar në flagrancë)

Benard Biba (arrestuar në flagrancë)

Kleidi Dyrma (arrestuar në flagrancë)

Ema Taip (arrestuar në flagrancë)

Eno Hana (arrestuar në flagrancë)