30-vjeçari nga Kosova Qerim Krasniqi i arrestuar me akuzën se i ka vjedhur me anë të mashtrimit 135 mijë euro një qytetareje nga Tirana u la në burg pa afat . Prokuroria ka shpjeguar se denoncimi është bërë në datën 15 shtator 2021 nga e dëmtuara Mariana Ç.
Ajo ka theksuar se jep dhoma me qira në bulevardin Zogu i Parë ku i arrestuari ka qëndruar pasi ka mbërritur në Shqipëri nga Zvicra. Gjatë qëndrimit në pronën e saj, denoncuesja thotë se Qerim Krasniqi është prekur nga covid, dhe ka pasur nevojë për përkujdesje. Për këtë arsye ajo e ka marrë të akuzuarin në banesën e saj. Në gusht 2021 ai i ka kërkuar asaj 50 mijë euro borxh me justifikimin se llogaritë e tij në Zvicër ishin bllokuar.
Më pas ai i ka kërkuar sërish të dëmtuarës shuma të ndryshme, 30 mijë euro, 28 mijë euro, 20 mijë euro dhe një shumë tjetër prej 6 mijë euro të cilën e ka marrë në pjesë të vogla, nga 400-500 euro.
Në total sipas kallëzueses shuma që ajo i ka dhënë të akuzuarit ka qenë 135 mijë euro të cilat Qerim Krasniqi ka premtuar se do t’i kthente të gjitha bashkë pasi do t’i zhbllokohej llogaria në Zvicër.
Denoncuesja ka komunikuar me shtetasin nga Kosova deri në dhjetor, dhe më pas, ai, duke mos kthyer borxhin, ka shkëputur çdo komunikim dhe ka fikur të gjithë numrat e telefonit. Pas nisjes së hetimeve bazuar në denoncimin e gruas së dëmtua, Qerim Krasniqi është shpallur në kërkim policor ndërkohë që në datën 22 prill 2022 ka tentuar të hyjë në Shqipëri ku është ndaluar.
Ai është pyetur për eurot që i kishte marrë shtetases Mariana Ç, të cilës pranoi se i ka marrë 85 deri në 87 mijë euro të cilën e ka investuar në bursë. Ai ka shpjeguar se fondet i ka dhënë tek një shtetas nga Maqedonia e veriut të cilin e njeh me emrin Rinor, por që gjeneralitetet e plota nuk ia di.
I arrestuari ka thënë se shtetasi maqedonas i ka marrë edhe 32 mijë euro të tjera dhe më pas është zhdukur duke e detyruar edhe atë që të shkëpusë kontaktet me Mariana Ç dhe të largohet nga Shqipëria. Pas arrestimit, i akuzuari nga Kosova është shprehur i gatshëm ta kthejë borxhin me këste nga 5 mijë euro në muaj të cilat i ka të ardhura nga tregtimi i kriptovalutave.
Po kështu Qerim Krasniqi ka pranuar se i ka marrë një doktoreshe me emrin Imelda një shumë prej 500 eurosh dhe nuk ia ka kthyer.
Discussion about this post