Tetë persona janë vënë në pranga në Hong Kong pasi akuzohen për mashtrim me kriptomonedha nga JPEX, ndërsa janë ngrirë llogari bankare me 150 milion dollarë. Ky është rasti më i madh i mashtrimit me kriptomonedha ku u kapën 1641 investitorë me fonde prej 1.2 mld dollarësh.
Të arrestuarit përfshijnë influencues të mediave sociale që promovuan shkëmbimin e monedhës JPEX dhe punonjës të JPEX, komunikuan autoritetet. Shefi ekzekutiv i Hong Kongut, John Lee në një konferencë shtypi tha se qeveria do të rrisë informimin mbi këto investime në mënyrë që investitorët të kuptojnë më mirë rreziqet e përfshira dhe se si fuksionojnë platformat, raportojnë mediat e huaja.
Kryeinspektori i lartë i policisë Kung Hing-fun u shpreh se investitorët ishin kryesisht të papërvojë dhe se ishin mashtruar se do të fiton shuma të larta parash. Arrestimet e tetëve pasuan një njoftim javën e kaluar se JPEX ishte i palicensuar dhe nuk kishte autoritet për të operuar platformën e saj të tregtimit të kriptomonedhave në qytet.
Sipas njoftimit disa investitorë ishin ankuar se nuk ishin në gjendje të tërhiqnin asetet e tyre virtuale nga llogaritë JPEX ose se kishin zbuluar se balancat e tyre ishin “reduktuar dhe ndryshuar”.
Policia deklaroi se nuk e kishte përjashtuar mundësinë e arrestimeve të tjera ndërsa hetimet e tyre janë në proces. Nëse dikush jashtë shtetit zbulohet se ka kryer krime në Hong Kong, forcat do t’i ekstradojnë përsëri në Hong Kong, tha Lee Mo-yin, mbikëqyrës në Byronë e Krimit Tregtar.
Hong Kongu kohët e fundit ka nisur të rregullojë sektorin e paqëndrueshëm të kriptomonedhave përmes një regjimi të detyrueshëm licencimi për shkëmbimet e centralizuara, pasi kërkon të zhvillojë në mënyrë të sigurt industrinë e tij të kriptomonedhave dhe të bëhet një qendër globale për këtë sektor.
Discussion about this post