Është vendosur në arrest shpëpie e akuzuara që mori mbi 61 mijë euro nga 29 persona për rregullimin e vizave. Gjykata Themelore në Mitrovicë për të akuzuarën për mashtrim me viza, Valbonë Peci ia ka zëvendësuar masën e paraburgimit me masën e arrestit shtëpiak.
E akuzuara Peci akuzohet se gjatë vitit 2020 dhe 2021, nga 29 persona ka marrë 61 mijë e 600 euro, të cilëve iu kishte premtuar rregullimin e vizave suedeze.
Në seancën e së mërkurës avokati i të akuzuarës Peci, Armend Krasniqi i propozoi gjykatës që masa e paraburgimit ndaj të mbrojturës së tij të zëvendësohet me masë tjetër alternative të sigurimit të pranisë së të pandehurës në procedurë.
Ky propozim nuk u kundërshtua nga prokurori i çështjes Sllobodan Bakiq, i cili i ka propozuar gjykatës që masën e paraburgimit ndaj të akuzuarës Peci ta zëvendësojë me masën e arrestit shtëpiak. Propozimet e palëve janë aprovuar nga gjyqtari i rastit Rrahman Beqiri.
Vendimi për zëvendësimin e masës së paraburgimit me masën e arrestit shtëpiak nga gjyqtari Beqiri, ka ardhur duke vlerësuar se kjo masë është e mjaftueshme për pengimin e përsëritjes së veprës penale nga e akuzuara, si dhe për sigurimin e pranisë së të njëjtës në procedurë.
Shqyrtimi gjyqësor i rradhës pritet të mbahet më 8 korrik 2022.
Discussion about this post