Kryeqytetasit paguajnë çdo muaj tarifa dhe taksa për ujësjellësin, por sërish përfundojnë duke e blerë në markete ujin për të pirë. Dhe kjo, jo vetëm për faktin se uji furnizohet pak orë në ditë, por nuk është i konsumueshëm. Gjithsesi, kryebashkiaku Erion Veliaj vazhdon me propagandën e tij prej më shumë se 8 vitesh, duke premtuar se Tirana do të furnizohet 24 orë me ujë të pijshëm.
Kryeministri madje bëri reklamë në Tik- Tok duke pirë ujë direkt nga çezma duke u tallur haptazi me qytetarët. Në marrjen e mandatit të dytë në një emision televiziv Veliaj tha se, “jemi shumë pranë asaj që ne duam të arrijmë, pasi tanimë 75% e Tiranës ka ujë të pijshëm 24 orë dhe shumë shpejt do të përfundohet edhe me disa zona periferike pasi paratë janë siguruar”.
Ai theksoi se qytetarët e Tiranës furnizohen 17 orë me ujë të pijshëm. Në fakt nuk është e vërtetë, sidomos aludimi se uji që vjen nga ujësjellësi është i konsumueshëm!
Nëse do ishte kështu, atëherë pse kompania e Bashkisë Tiranë “Eco Tirana” ka hapur projekt për impiantin e pastrimin e ujit për personelin e bashkisë?!
Bëhet fjalë për tenderin me numër reference REF-72938-06-19-2023 dhe objekt “Impiant për pastrimin e ujit”, për të cilin është vënë në dispozicion fondi limit prej 166 milionë lekësh. Tenderi zhvillohet nga “Eco Tirana sha”, firmë e themeluar bashkë me ortakët italianë nga Lali Eri dhe që varet nga kryetari i Bashkisë. Parashikohet që fituesi të shpallet më datë 25 korrik 2023.
Ndërkaq, sipas të dhënave të dokumentit vendosja e këtij impianti duhet të kryhet deri në mars të viti 2024.
Kjo vjen si një lëvizje pas deklaratës të shumë përsëritur të Veliajt që “brenda vitit 2024 Tirana do të ketë ujë të pijshëm 24 orë”. Kështu deklaroi kryebashkiaku gjatë fushatës elektorale në maj, por duhet t’i kujtojmë që së pari të sigurohet të jetë uji i pijshëm, qoftë edhe për kaq orë sa furnizohet aktualisht Tirana. Kujtojmë se Bashkia Tiranë blen çdo vit sasi të mëdha uji nga kompanitë private. Me sa duket “Eco Alba” është gjetur si një mënyrë për t’iu shmangur syrit të publikut.
Sepse edhe uji që vjen 7 orë, por në itinerare kohore të ndryshme gjatë ditës, nuk është i pijshëm. Madje shpesh herë në media ka pasur edhe denoncime ku tregohet se uji shkon me ngjyrë blu, me erë apo ngjyrë të zezë, sepse përzihet me ujërat e zeza.
Rritja e çmimit të ujit
Në këto 8 vite e vetmja gjë që ka bërë Veliaj është rritja e çmimit të ujit. Në vitin 2017, Enti Rregullator i Energjisë miratoi rritjen me 44% të çmimit të ujit si për abonentët familjarë ashtu edhe për bizneset.
Çmimi i ujit nga 45 lekë u bë 65 lekë dhe çmimi për biznesin u rrit nga 135 lekë në 190 lekë.
Veliaj tha “kjo do të përkthehej në investime për rrjetin e UKT dhe rritjen e kapacitetit të ujëmbledhësit të Bovillës, duke bërë që Tirana të kishte ujë 24 orë falë shtrenjtimit të së mirës së domosdoshme”. Plan i cili nuk pati efekt.
Prej atij viti qytetarët e paguajnë dy herë ujin, njëherë në faturën për bashkinë e Tiranës dhe për herë të dytë kur e blejnë në autobote ose dyqane me çmime që arrijnë deri në 120 lekë të reja për bidonë. Duhet të theksojmë se në fund të viti 2022, çmimi i ujit në treg është rritur po aq sa produktet e tjera.
Lexo edhe: Seanca në KPK/ Prokurori Zonja nxjerr bllof Veliajn për vdekjen e Ardit Gjoklajt: U vra në landfill
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post