Një 37-vjeçar është arrestuar dhe 5 të tjerë janë proceduar penalisht, ndërsa një tjetër 37-vjeçar është shpallur në kërkim, përfshirë në një skemë mashtrimi përmes një call centeri në Tiranë. Policia ka zbuluar një apartament të përshtatur si call center në rrugën “Panorama” në kryeqytet, ku të arrestuarit, në bashkëpunim me njëri-tjetrin, mashtronin shtetas të huaj për t’i tërhequr të investonin në bursa fiktive.
Organizatori i kësaj veprimtarie, Ledjan Xhialli, është vënë në pranga, ndërsa Ronaldo Milo, i cili kishte marrë apartamentin me qira, është shpallur në kërkim. Operatori i call centerit dhe 5 bashkëpunëtorët e tij po hetohen në gjendje të lirë. Gjatë operacionit “Location 2”, janë sekuestruar pajisje kompjuterike dhe celularë, si dhe prova të tjera materiale. Po vijon puna për kapjen e të shpallurit në kërkim. Materialet procedurale i kaluan Prokurorisë për veprime të mëtejshme.
Njoftimi i Policisë:
Zbulohet një apartament i përshtatur si call center, ku mashtroheshin shtetas të huaj, përmes telefonit, për të investuar në bursa fiktive.
Shpallet në kërkim 37-vjeçari që e kishte marrë me qira apartamentin, për këtë qëllim.
Sekuestrohen pajisje kompjuterike, celularë dhe prova të tjera materiale.
Si rezultat i hetimeve të kryera gjatë dy muajve, në drejtimin e Prokurorisë, specialistët e Seksionit për Hetimin e Krimeve Ekonomike dhe Financiare, në bashkëpunim me Forcën Operacionale të DVP Tiranë, kanë finalizuar operacionin policor të koduar “Location 2”. Si rezultat i këtij operacioni:
– u arrestua në flagrancë shtetasi L. Xh., 37 vjeç;
– u shpall në kërkim shtetasi R. M., 37 vjeç;
– nisi procedimi penal për shtetasit D. O., 19 vjeç, J. B., 20 vjeç, R. L., 26 vjeç, J. D., 24 vjeçe dhe E. N., 34 vjeçe.
Gjatë operacionit, shërbimet e Policisë kanë ndërhyrë në apartamentin në rrugën “Panorama”, që ishte përshtatur si call center, ku kanë kapur në flagrancë shtetasi L. Xh. dhe 5 operatorë, të cilët mashtronin shtetas të huaj, për të investuar në bursa fiktive.
Nga hetimet rezultoi se apartamenti ishte marrë me qira nga shtetasi R. M., me qëllimin për ta përdorur për këtë veprimtari të kundërligjshme. Vijon puna për kapjen e këtij shtetasi.
Materialet procedurale i kaluan Prokurorisë, për veprime të mëtejshme.
Discussion about this post