Mashtronte qytetarët nën logon e Bankës Kombëtare Tregtare, arrestohet 21-vjeçari (Emri) – Skema

Drejtoria e Hetimit të Krimit Kibernetik ka finalizuar operacionin policor të koduar Smart Bank Phishing duke arrestuar autorin kryesor. U vu në pranga Orlando Gjoka 21 vjeç banues në Laç si dhe u proceduan në gjendje të lirë shtetasit D G 23 vjeç dhe E Gj 21 vjeç

Gjoka, sipas hetimeve, kishte krijuar një profil të rremë në rrjetet sociale duke përdorur logon dhe emrin e Bankës Kombëtare Tregtare BKT.

Ai kontaktonte qytetarët online duke u ofruar kredi të rreme

Me akses të paautorizuar Gjoka arrinte të boshatiste fondet e llogarive të qytetarëve.

Në raste kur llogaritë ishin bosh ai shtynte viktimat të depozitonin shuma nga 750 deri në 1500 euro me premtimin e rremë të një kredie prej 15000 eurosh.

Hetimet vijojnë për zbardhjen e plotë të skemës dhe identifikimin e bashkëpunëtorëve të tjerë

Materialet procedurale i janë referuar Prokurorisë për veprat penale Falsifikimi kompjuterik Mashtrim kompjuterik Ndërhyrje kompjuterike dhe Keqpërdorimi i thirrjeve telefonike, njoftoi policia.

***

Njoftimi i policisë

Finalizohet operacioni policor i koduar “Smart Bank Phishing”, për goditjen e një rasti të mashtrimit kompjuterik.Vihet në pranga autori kryesor i rastit, si dhe procedohen 2 shtetas.Drejtoria e Hetimit të Krimit Kibernetik në Departamentin e Policisë Kriminale, në bashkëpunim me Drejtorinë e Forcës së Posaçme Operacionale dhe në koordinimin e Prokurorisë pranë Gjykatës së Juridiksionit të Përgjithshëm Tiranë, zhvilloi dhe finalizoi operacionin policor të koduar “Smart Bank Phishing”. Në kuadër të operacionit u bë i mundur identifikimi dhe arrestimi i shtetasit Orlando Gjoka, 21 vjeç, banues në Laç, si dhe u proceduan penalisht, në gjendje të lirë, shtetasit D. G., 23 vjeç dhe E. Gj., 21 vjeç. Shtetasi O. Gj. kishte krijuar një profil të rremë në rrjete sociale, duke përdorur logon dhe emrin e Bankës Kombëtare Tregtare, me qëllim mashtrimin e qytetarëve. Ai kontaktonte qytetarët, përmes platformave të ndryshme online, duke iu ofruar kredi të rreme pranë bankës, ndërsa nëpërmjet aksesit të paautorizuar në llogaritë e tyre bankare, arrinte të boshatiste fondet.

Në rastet kur llogaritë nuk kishin para, ai i shtynte qytetarët të depozitonin shuma nga 750 deri në 1 500 euro, me premtimin e rremë të një kredie prej 15 000 eurosh. Falë bashkëpunimit të ngushtë mes ekspertëve të Krimit Kibernetik dhe Drejtorisë së Forcës së Posaçme Operacionale, u bë i mundur ndalimi i autorit kryesor dhe ndërprerja e veprimtarisë së paligjshme. Hetimet vijojnë për zbardhjen e plotë të skemës dhe identifikimin e bashkëpunëtorëve të tjerë të mundshëm. Materialet procedurale i janë referuar Prokurorisë pranë Gjykatës së Juridiksionit të Përgjithshëm Tiranë, për veprime të mëtejshme, për veprat penale “Falsifikimi kompjuterik”, “Mashtrim kompjuterik”, “Ndërhyrje kompjuterike” dhe “Keqpërdorimi i thirrjeve telefonike”.