Temperaturat e larta që kanë përfshirë vendin kanë favorizuar përhapjen e flakëve në zona të ndryshme të Shqipërisë. Mësohet se pas Shkodrës, Vlorës dhe Krujës, një tjetër vatër zjarri është aktivizuar në bashkinë e Matit. Bëhet me dije vatra e zjarrit hyri në Mat nga krahu i Mirditës. Bëhet fjalë për zjarrin e shfaqur në vendin e quajtur Mali i Toles, në fshatin Lam i Madh të Njësisë Administrative Derjan.
Forca të Bashkisë Mat, të mbështetura nga forcat e Ushtrisë, po punojnë pa ndërprerje për shuarjen edhe të kësaj vatre zjarri, por situata mbetet e vështirë, pasi tymi i shpërndarë nga era pengon punën e zjarrfikësve.
Nga vendi i ngjarjes raportohet se të paktën në tre raste janë detyruar të tërhiqen pasi rrezikohej jeta e njerëzve. Puna po vazhdon, dhe, në disa vatra në drejtime të ndryshme janë izoluar flakët duke u shpëtuar zona pyjore.
Megjithatë zjarri mbetet aktiv dhe paraqet rrezik për dëme të mëdha në krahun e Mirditës pasi ka avancuar shumë e nuk ka ndërhyrje forcash për shuarjen e tij. Ndërsa në zonën e Matit po punojnë aktualisht 47 forca, ku 20 janë forca të ushtrisë.
Discussion about this post