Rreth 22 mijë maturantë kanë aplikuar për të nisur studimet në një prej 38 institucioneve të arsimit të lartë publike apo private në vend.
Prej 29 korrikut deri më 3 gusht ata kanë mundësi të përzgjedhin në portalin u-Albania 10 degë më të pëlqyera.
Drejtori i Rrjetit Akademik Shqiptar Arjan Xhelaj i këshillon të bëjnë kujdes pasi mesatarja e viteve të gjimnazit është filtri hyrës për programet e studimit në universitet.
“Studimet bachelor është mesatarja 6.5 dhe këtyre maturantë do u dalin vetëm programet profesionale, ndërsa të tjerëve do u dalin të gjithë programet e studimet. Ka dhe raste të tjera siç janë ato në fakultetin e mjekësisë ka disa degë që kanë dhe specifikat e tyre”, është shprehur ai.
Renditja e fituesve do të publikohet në portal në fund të gushtit ndërsa regjistrimet në universitet do të nisin më 2 shtator.
Raundi i parë do të ndahet në shtatë faza 48 orëshe të cilat duhet të monitorohen nga kandidatët për studentë për të përzgjedhur degën më të pëlqyer.
“Çdo 48 orë listat do të rifreskohen me regjistrimet e bëra dhe me vednet e lira për maturantët që kanë qenë në pritje”, ka thënë ai.
Maturantëve të pakënaqur me programet e arritura në fazën e parë do tu jepet dhe një mundësi në një raund të dytë në mesin e muajit shtator.
