Kombëtarja e Izraelit ka siguruar medaljen e bronztë, në finalen e vogël të Botërorit U-20, përballë Koresë së Jugut.
Ndeshja e luajtur në La Plata, u mbyll me rezultatin 3-1 për ekipin e shtetit hebre.
Rezultati u zhbllokua në minutën e 19’, me Binyamin që realizoi një super gol, falë një goditje akrobatike të shkëlqyer.
Rezultati u baraspeshua në minutën e 24’, falë një penalltie shumë të diskutueshme. Lee u tregua gjakftohtë nga 11 metrat, duke mposhtur me zgjuarsi portierin izraelit, Melika.
Me rezultatin 1-1, u mbyllën 45 minutat e para. Në fraksionin e dytë të lojës, skuadrat nuk e ulën ritmin me koreanët dhe izraelitët, që kërkuan me insistim, golin e avantazhit.
Sulmet e kombëtares nga Lindja e Mesme, u shtuan me kalimin e kohës e në minutën e 76’, më në fund, Izraeli kaloi përsëri në epërsi, falë një goditje të saktë të Senior.
Koreja e Jugut, nuk kishte kthjelltësinë e duhur që të barazonte rezultatin, me Izraelin që në të 85-ën minutë, hipotekoi vendin e tretë, falë golit të Khalaili.
Kjo është një arritje historike për futbollin e shtetit hebre, të cilët për herë të parë, në një eveniment të FIFA-s, siguruan një vend në podium./m.b /gijotina.com
Discussion about this post