Kanë nisur homazhet në Muzeun Historik Kombëtar në nder të aktorit të madh Mirush Kabashi i cili ndërroi jetë ditën e djeshme në moshën 75 vjeçare.
Pjesëmarrësit janë të shumtë, nga familjarët, miqtë e aktorit dhe deri te figura të shquara të artit, të cilët duan t’i japin lamtumirën e fundit, artistit të shquar të skenës dhe ekranit.
Pritet që homazhet të mbahen deri rreth orës 13:00 dhe më pas trupi do të prehet në varrezat e Sharrës..
Kujtojmë që Mirush Kabashi u nda nga jeta një ditë më parë pasi luftoi për disa vite me një sëmundje të rëndë.
Mirush Kabashi lindi më 17 prill 1948 në Shkodër dhe është rritur në Durrës. Origjina e tij është nga Gjakova. Ai është aktor i rreth 100 roleve, në teatër dhe filma. Shpesh ka qenë edhe prezantues i aktiviteteve të shumta artistike.
Gjithashtu, Kabashi është cilësuar si një nga interpretuesit më të mëdhenj të poezisë në Shqipëri. Ai ka dhënë një kontribut të madh në filmografinë shqiptare.
E ndërsa një pjesë të jetës së tij ia ka kushtuar edhe teatrit me rolet e tij të larmishme, ku ndër to më i veçanti ka mbetur ai i Sokratit tek “Apollogjia e fundit e Sokratit”.
Që prej vitit 2014 mbante titullin e lartë “Nderi i Kombit”, më parë kishte titujt “Artist i Merituar” dhe “Mjeshtër i Madh i Punës”.
Discussion about this post