Liderët e vendeve të Ballkanit Perëndimor dhe përfaqësues të Bashkimit Europian, do të mblidhen ditën e sotme në samitin e Brdos në Slloveni. I pranishëm mes tyre mësohet se do të jetë edhe kryeministri Edi Rama, i cili ka mbërritur në Slloveni një ditë më parë.
Takimi pritet të nisë rreth orës 08:40, ndërsa pritet që në orën 13:30 të ketë edhe një konferencë për mediet. Ky samit pritet të japë një mesazh mbi çështjen e integrimit të Shqipërisë dhe Maqedonisë së Veriut në Bashkimin Evropian. Një temë tjetër kryesore që pritet të diskutohet është rritja e çmimeve të gazit.
Një ditë më parë, është zbardhur axhenda e cila pritet të diskutohet nga liderët e Ballkanit e BP dhe BE. Sipas axhendës, samiti do të kryesohet nga Charles Michel, President i Këshillit Evropian, i cili bashkë me presidenten e Komisionit, Ursula von der Leyen do të përfaqësojnë BE -në.
Në samit pritet të diskutohet rreth riafirmimit të perspektivës evropiane të Ballkanit Perëndimor, i cili është me interes strategjik reciprok dhe mbetet një zgjedhje e përbashkët strategjike. Gjithashtu në qendër të bisedimeve do jetë dhe zhvillimi i bashkëpunimit dhe rimëkëmbja socio-ekonomike të rajonit, në kontekstin e pandemisë së Covid-19.
Zbatimi i Planit Ekonomik dhe të Investimeve (EIP), i cili përcakton një paketë të konsiderueshme investimesh dhe do të gjenerojë rritje më të qëndrueshme dhe të fokusuar tek njerëzit, duke përfituar rajonin dhe Evropën në tërësi, do të jetë gjithashtu në qendër të diskutimeve.
Samiti është pjesë e angazhimit strategjik të BE-së me Ballkanin Perëndimor, në përputhje me axhendën Strategjike 2019-2024. Ai pason Samitin BE-Ballkan Perëndimor 2018 në Sofje dhe samitin 2020 BE-Ballkan Perëndimor në Zagreb, i cili u mbajt përmes video-konferencës.
