Sot bëhet një vit nga arrestimi i Hashim Thaçit, i cili aktualisht po qëndron në paraburgimin e Hagës. Në 5 nëntor 2020 ai është dërguar në Hagë së bashku me Veselin dhe të tjerë krerë të UÇK-së.
I ati i tij, Haxhi Thaçi tha se mbajtja e ish-krerëve të UÇK’së në Hagë është e padrejtë dhe drejtësia do të triumfojë së shpejti.
“Unë mendoj se do të lirohet së shpejti sepse janë të pafajshëm tanë. Të fortë janë kanë edhe kanë me kanë. Ku të qëllojnë ata kanë me kanë të fortë”, u shpreh Haxhi Thaçi.
Ai gjithashtu pohon se veprimtaria e të birit e bën të ndihet krenar për atë çka ka bërë.
Ish-presidenti i Kosovës, Hashim Thaçi gjatë paraqitjes së tij të parë në Hagë, ishte deklaruar i pafajshëm për të gjitha pikat e aktakuzës për krime lufte dhe krime kundër njerëzimit.
Veprat që rëndojnë ndaj Thaçit kanë të bëjnë me krime lufte, ndalimit të paligjshëm ose arbitrar, trajtimit mizor, torturës dhe vrasjes së paligjshme dhe krimet kundër njerëzimit të burgosjes, akteve të tjera çnjerëzore, torturës, vrasjes së paligjshme, zhdukjes me forcë të personave dhe përndjekjes, të cilat sipas Dhomave të Specializuara, janë kryer midis marsit 1998 dhe shtatorit të vitit 1999.
Në aktakuzë shkruhet se krimet dyshohet se janë kryer në disa zona të Kosovës, por edhe në Kukës dhe Cahan në Shqipërinë Veriore. Gjithashtu thuhet se ato u kryen nga anëtarë të Ushtrisë Çlirimtare të Kosovës (UÇK) kundër qindra civilëve dhe personave që nuk merrnin pjesë aktive në luftime.
Discussion about this post