Ministri i Jashtëm grek Nikos Dendias ka reaguar sërisht lidhur me mbajtjen në burg të Fredi Belerit, i cili në 14 maj fitoi mandatin e kryebashkiakut të Tiranës, por që rrezikon ta humbasë nëse nuk bën betimin para Këshillit Bashkiak.
Media greke Protothema i ka kushtuar një artikull çështjes Beleri, referuar në vendimin e fundit të GJKKO-së që refuzoi lirimin e tij nga burgu, ose ndryshimin e masës së sigurisë.
Media greke shkruan se Ministria e Punëve të Jashtme të Greqisë shprehet se mbajtja në burg e Belerit shkakton shqetësim të thellë dhe pengon drejtpërdrejt betimin e tij.
“Refuzimi që iu bë z. Beleri për të marrë detyrën si kryebashkiaku i ri i Himarës pengon drejtpërdrejt betimin e tij dhe nxit reflektim të thellë mbi qëllimet e vërteta që qëndrojnë pas ndjekjes penale.
Ministria e Jashtme e Greqisë po i ndjek nga afër zhvillimet dhe pret respektimin e prezumimit të pafajësisë – element themelor i shtetit ligjor – nga shteti fqinj”, thuhet në njoftimin përkatës, cituar nga protothema.
Avokatët e Belerit kanë deklaruar se do të apelojë në Gjykatën e Lartë vendimin e GJKKO dhe do të kërkojnë lirimin e kryebashkiakut.
Lufta për lirimin e Belerit ka të bëjë edhe me mundësinë e pranisë personale në betimin e tij, në funksion të mbledhjes përkatëse të Këshillit Bashkiak.
Fredi Beleri u arrestua më 12 maj, dy ditë para zgjedhjeve lokale. Arrestimi dhe paraburgimi i tij ka shkaktuar reagime të ashpra si brenda Shqipërisë, ashtu edhe ndërkombëtarisht, përfundon artikulli i Prothema.
Discussion about this post