Organizata Botërore e Shëndetësisë ka dhënë një tjetër problem shëndetësor që po merr shumë jetë njerëzish në të gjithë botën. Në një raport të fundit, OBSH evidenton se, epidemia e mbipeshës dhe obezitetit shkakton mbi 1.2 milion vdekje në vit në të gjithë Evropën. Ndër të tjera në këtë raport, OBSH-ja evidento se normat e obezitetit në rajon janë rritur për 138 për qind në pesë dekadat e fundit. Konkretisht, gati një e katërta e të rriturve tani janë obezë në Evropë – më shumë se në çdo rajon tjetër, përveç Amerikës, tha OBSH-ja.
“Përqindjet e mbipeshës dhe obezitetit kanë arritur përmasa epidemike në të gjithë rajonin dhe janë duke u përshkallëzuar. Rritja e indeksit të masës trupore është faktor kryesor rreziku për sëmundjet jo të transmetueshme, përfshirë kancerin dhe sëmundjet kardiovaskulare”, citohet në raport drejtori rajonal i OBSH-së, Hans Kluge. Obeziteti shkakton së paku 13 lloje të ndryshme të kancerit dhe ka të ngjarë të jetë përgjegjës për së paku 200,000 raste të reja të kancerit në vit, thuhet në raport.
Discussion about this post