Rreth 30 familje, banorë të rrugëve “Azem Hajdari” dhe “Valët e Detit”, në zonën e ish-kënetës kanë protestuar këtë të hënë para bashkisë së Durrësit, pasi shtëpitë e tyre janë shembur nga tërmeti i vitit 2019 dhe prej më shumë se 5 vitesh kanë mbetur të pastrehë, pavarësisht premtimeve nga Qeveria.
Kur nisi zbatimi i projektit, banorët kishin aplikuar në Agjencinë Shtetërore te Kadastrës për legalizimin e banesave, por ende nuk ishin pajisur me certifikate pronësie. Ndërsa Fondi Shqiptar i Zhvillimit, si financues dhe zbatues i projektit u kishte premtuar se do të kompensohen me banesa të reja, me të njëjtën sipërfaqe.
“Ne kemi 5 vite që sorollatemi në çdo institucion. Na kanë dhënë do i merrni apartamentet tek pallatet e reja, por letrat kanë ngel tek ASHK-ja e Durrësit, nuk i kanë çuar për VKM. I bëjmë thirrje Ramës të gjejë zgjidhje se ndryshe do e çojmë çështjen në SPAK”, tha protestuesit.
Banorët tregojnë se janë ankuar në të gjitha institucionet lokale e qëndrore dhe u kanë premtuar zgjidhje, por fakti është se ende jetojnë me qira.
Banorëve u ishin premtuar apartamente në lagjen e Spitallës, por pas përfundimit të pallateve, ata nuk morën asgjë dhe ngelën të pastrehë.
“Pallatet e rindërtimit kanë përfunduar por ne s’po na fusin brenda. Jetojmë me qira prej 5 vitesh. Unë jam vet i shtati në familje dhe paguaj qiranë 35 mijë lek në muaj. Duam shtëpitë e reja që na kanë premtuar”, shprehen banorët.
Banorët e pastrehë të ish-Kënetës përfunduan tubimin pa mundur të kontaktojnë me zyrtarë të bashkisë së Durrësit. Ata thanë se do përshkallëzojnë protestën nëse problemi i tyre 5-vjeçar nuk merr zgjidhje.
Discussion about this post