“Mbi 7 000 mijë veta nga Shqipëria në Athinë”, Mariglen Disha: Nuk e kam thënë, është montazh

Mariglen Disha ka përgënjeshtruar se ka deklaruar që mbi 7000 personave nga Shqipëria kanë shkuar në mitingun e kryeministrit Edi Rama në Athinë.

Në media u publikua më herët një prononcim i shkurtër i kryebashkiakut të Librazhdit, i cili thotë për gazetarin e emisionit “Piranjat” se është mbi 7 mijë numri i atyre që kanë kaluar kufirin grek për të qenë pjesë e mitingut të Ramës me emigrantët në Athinë.

“Sa persona mendoni se kanë ardhur nga Shqipëria”, është pyetja që i bëhet kryetarit socialist të Bashkisë Librazhd. Mariglen Disha përgjigjet: Mbi 7 000 veta.

Si pyetja ashtu edhe përgjigja dëgjohen qartë në materialin audio-viziv të publikuar nga emisioni “Piranjat” dhe shpërndarë më pas në rrjetet sociale nga kreu i opozitës Sali Berisha.

Por, Disha pretendon se materiali është i montuar.

Në një reagim në “FB” ai shkruan se pyetjes që i është përgjigjur me “mbi 7000 veta” nuk është “sa persona mendoni që kanë ardhur nga Shqipëria”.

Disha shprehet se “jam pyetur prej tyre sa mendoni se është numri i personave të pranishëm në atë takim, dhe jam përgjigjur 7000”.

“Me paturpësi, këtë përgjigje e kanë montuar duke e shkëputur nga konteksti dhe e kanë qepur sipas nevojës së propagandës së tyre bajate, sikur të pranishmit në takim ishin marrë me vete nga Shqipëria. Një qepje ordinere që keqpërdor në ekstrem përgjigjen time tjetër për tjetër gjë”, shton ai.