Është shoqëruar sërish me debate mbledhja e sotme e Grupit Parlamentar të Partisë Demokratike mes Flamur Nokës dhe kreut Lulzim Basha. Mësohet se Noka i ka thënë liderit të demokratëve që në mbledhje po diskutohet si të jetë situata normale, por sipas tij, demokratët janë të paqartë.
Noka: Deri në zgjedhjen e kryesisë e kishe kauzën politike “masakrën zgjedhore”, dhe pas zgjedhjes së kryesisë, ti e ktheve në thërrime çështjen e masakrës zgjedhore.
Basha: S’është e vërtetë. Unë e kam deklaruar dhe kam folur për masakrën në çdo dalje timen. Ju duhet të merrni informacion pranë prokurorive dhe të interesoheni për masakrën zgjedhore të 25 prillit, ashtu siç u bë me Vaun e Dejës.
Noka: Ti duhet të dalësh në terren, për t’u shpjeguar demokratëve vendimin që more për përjashtimin e Berishës, se ke përçarë demokratët.
Basha: Do t’i sqaroj demokratet, por pa i hedhur benzinë zjarrit.
Noka: Ti i ke hedhur tritolin.
Oerd Bylykbashi: Reformat nëse do nisin, duhet bërë më parë strategjia, dhe reforma pa pasur një strategji të qartë…
Reformat duhet të jenë për të arritur tek rezultatet që synojnë dhe jo për të mbuluar zhvillimet e tjera. Synimet kryesore tonat janë Reforma Zgjedhore dhe Reforma Territoriale, por reformat duhet të gjejnë kohën e vet për t’i filluar.
Basha: Jam dakord për strategjinë.
Bylykbashi: S’të vë faj për 2014-ën se është i vetmi vendim qe ke marrë në mënyrë kolegjiale, të tjerat i ke marrë vetë.
Në mbledhjen që nisi në orën 11:00 në selinë blu, është vendosur që deputetët demokratë të paraqiten në salla sa herë që të kenë mbledhje të Komisioneve Parlamentare.
Demokratët kanë diskutuar edhe për Reformën Territoriale, për të cilën kreu i PD-së tha se shumë shpejt do të ngrihet grupi i punës dhe do të nisin konsultimet me qytetarët në zonat e deputetëve.
Basha ka udhëzuar deputetët që të zbresin në zonat e tyre dhe të adresojnë problemet e qytetarëve, kryesisht për rritjen e çmimeve të produkteve ushqimore. Ai i ka konsideruar skandaloze çmimet e rritura, që sipas tij dëmtojnë shumicën e qytetarëve.
Kryedemokrati ka qenë i prerë kur është shprehur se PD duhet të bëjë gjithçka që të ndajë politikën nga krimi, dhe se duhen denoncuar aferat e përditshme korruptive të qeverisë.
