Kreu i Partisë Demokratike, Lulzim Basha mësohet se në mbledhjen e grupit parlamentar u ka kërkuar deputetëve që të takohen me qytetarët për shqetësimet e tyre.
“Bëhuni zëri i problemeve të qytetarëve. Zbrisni në zonat tuaja dhe bëni publike shqetësimet e tyre. Rritja e çmimeve është skandaloze në kushtet e një varfërie që ka përfshirë shumicën dërrmuese të qytetarëve”.
Sa i përket Reformës Territoriale, Basha ka kërkuar që deputetët të nisin konsultimet me qytetarët në zonat përkatëse.
“Nisni konsultimet me qytetarët në zonat tuaja për reformën teritoriale. Së shpejti do të ngrihet grupi i punës në PD për të hartuar draftin ligjor”.
Ndër të tjera, Basha mësohet se u ka kërkuar deputetëve të marrin informaçion pranë prokurorive për ecurinë e hetimeve për 25 prillin, ose siç e quan ai “masakrën zgjedhore”.
“Merrni informacion pranë prokurorive për ecurinë e hetimeve për masakrën zgjedhore të 25 prillit. Duhet bërë transparencë e procesit hetimor që po zvarritet me urdhra politikë dhe ndjekur në çdo hallkë të gjyqësorit dhe jo vetëm. S’mund të pretendohet për drejtësi të pavarur sa kohë nuk ndëshkon dhunuesit e procesit zgjedhor”, mësohet të ketë thënë Basha.
Ndër të tjera, gjatë mbledhjes me grupin parlamentar, opozita ka vendosur të mos njohë vendimin e Konferencës se Kryetareve për mbledhje online të Komisioneve Parlamentare, duke marrë pjesë fizikisht në takime.
