Ish-ministri i Shëndetësisë, Tritan Shehu ka reaguar lidhur me vendimin e qeverisë për t’i zhvilluar online mbledhjet e Komisioneve Parlamentare.
Shehu shkruan në Facebook se ky vendim është një goditje ndaj demokracisë dhe kërkon t’i mbyllë gojën opozitës.
“Beteja për të drejtën e Komisioneve Parlamentare, një betejë totalë për të ndalur këtë regjim! Është një goditje ndaj demokracisë në rrugën pa krye të thellimit të autokracisë. Është një vendim tipik i autokracive lindore, që jo vetëm e inspirojnë, por dhe kondicionojnë e kontrollojnë Ramën e regjimin e tij, duke e përdorur për interesat e tyre në rajon. Është një vendim, që kërkon të nëpërkëmbë e mbyllë gojën jo vetëm opozitës e deputetëve të saj”.
Sipas tij, ky vendim godet dhe mediet duke i larguar nga debatet, por mbi të gjitha godet opinionin shoqëror për të qenë në brendësi të zhvillimeve në shoqëri.
“Ai vendim godet po kaq rëndë edhe median, duke e larguar atë nga deputetët, debatet, duke tentuar të shurdhojë atë, me qëllimin e vetëm për ta detyruar kështu e të heshtë. Por mbi të gjitha në këtë mënyre ai godet opinionin shoqëror, të drejtën themelore të tij për informacion, për të qenë në brendësi të zhvillimeve aktive ne shoqëri, duke tentuar ta ktheje në një qenie pasive e pa shqisa”, shkruan Shehu.
Ndër të tjera, deputeti shkruan se vetëm Kim Jong-un mund të guxonte të vendoste një Komitet të tillë para Parlamentit e ta përdorte për të goditur sovranitetin e tij.
