Socialistët kanë njoftuar se mbledhjen e Komisionit parlamentar të Ekonomisë do e zhvillojnë online.
Ky vendim ka lidhje me tensionet që u krijuan gjatë paradites së sotme në pothuajse të gjitha komisionet, ku deputetë të opozitës, arritën të bllokojnë zhvillimin e procedurave normale.
Lidhur me vendimin për mbajtjen e mbledhjeve online, ka reaguar Grupi Parlamentar i PD, i cili ka deklaruar se këto mbledhje mund të bëhen online vetëm në raste të masave të jashtëzakonshme që mund të vendosen për shkak të gjendjes së luftës, gjendjes së jashtëzakonshme ose gjendjes së fatkeqësive natyrore.
“Nuk dihet nëse PS ka shpallur gjendjen e luftës apo të jashtëzakonshme, por kjo procedurë e mbledhjeve online lejohet vetëm në ato raste”, thuhet në reagimin e grupit parlamentar të PD.
Reagimi i grupit parlamentar të PD:
Pas bllokimit që deputetët e opozitës i kanë bërë punimeve të Kuvendit sot, deputetët e PS kanë njoftuar shtyrjen e mbledhjes dhe zhvillimin e saj online.
Sipas nenit a/5 të Rregullores së Kuvendit vetëm në raste të masave të jashtëzakonshme që mund të vendosen për shkak të gjendjes së luftës, gjendjes së jashtëzakonshme ose gjendjes së fatkeqësive natyrore, mbledhjet e seancës plenare dhe organeve të Kuvendit mund të zhvillohen edhe në distancë nëpërmjet mjeteve të komunikimit elektronik.
Nuk dihet nëse PS ka shpallur gjendjen e luftës apo të jashtëzakonshme, por kjo procedurë e mbledhjeve online lejohet vetëm në ato raste.
Discussion about this post