Kryetari i Partisë Demokratike Sali Berisha ka mbledhur Këshillin Kombëtar të PD-së. Berisha e nisi fjalimin e tij me problemet e vendit që kanë sjellë sipas tij krizën duke fajësuar qeverinë Rama.
Sipas tij vendi ndodhet në një moment kritik, ndërsa kryeministri Rama angazhohet në “Ballkanin e Hapur”, ku si pas tij promovohet bashkëpunimi Vuçiç – Rama.
“Siç ndiqni situatën, Edi Rama, çdo javë, muaj, zhytet gjithnjë e më thellë në vasalitet të plotë ndaj presidentit serbomadh Aleksandër Vuçiç dhe Beogradit. Në rast se ju merrni diskurin e tij të muajit të fundit, në këtë diskur njeriu më të mbrojtur, më të cituar në rajon, Europë, Botë në fjalimet e Ramës do të gjeni Vuçiçin. Ky vasal i tij kalon nga samiti në samit, nga takimi në takim, duke mbrojtur një Putin të vogël në rajon, duke i dhënë këshilla Evropës dhe botës, duke justifikuar plotësisht rreshtimin e Vuçiçit me Rusinë dhe kundër sanksioneve të BE-së, duke i paraqitur kërkesën për zbatimin e sanksioneve nga Vuçiçi si një kërkesë të rrezikshme për paqen e rajonin. E vërteta është se prapa mbrojtjes që i bën Rama aksit Moskë-Beograd, qëndron vasaliteti i tij ndaj Beogradit dhe indirekt ndaj Moskës. Qëndron shkelmimi që ai u bën interesave kombëtare të shqiptarëve”, tha Berisha.
Në fokus të mbledhjes do të jenë diskutimet rreth situatës politike, si edhe aksioni opozitar që do të ndjekë Komisioni i Rithemelimit.
Gjithashtu në mbledhje do të diskutohet edhe ecuria e grupeve të punës në të gjithë vendin.
Discussion about this post